Newdelhi , 30 ഓഗസ്റ്റ് (H.S.)

ന്യൂഡൽഹി: രാജ്യത്തിന്റെ വ്യോമപ്രതിരോധ സംവിധാനം കൂടുതൽ ശക്തമാക്കുന്നതിനായി റഷ്യയിൽ നിന്ന് അഞ്ച് എസ്-400 (സുദർശൻ) എയർ ഡിഫൻസ് സ്ക്വാഡ്രണുകൾ കൂടി വാങ്ങാൻ ഇന്ത്യ ഒരുങ്ങുന്നു. ഏകദേശം 50,000 കോടി രൂപ ചെലവ് പ്രതീക്ഷിക്കുന്ന ഈ വൻ പ്രതിരോധ ഇടപാടിനായുള്ള ഇന്ത്യയുടെ ടെൻഡറിന് റഷ്യ ഔദ്യോഗികമായി മറുപടി നൽകി. നിലവിലുള്ള സംവിധാനങ്ങൾക്ക് പുറമെ പുതിയ സ്ക്വാഡ്രണുകൾ കൂടി എത്തുന്നതോടെ അയൽരാജ്യങ്ങളിൽ നിന്നുള്ള വ്യോമാക്രമണ ഭീഷണികളെ ഫലപ്രദമായി പ്രതിരോധിക്കാൻ ഇന്ത്യക്ക് കൂടുതൽ കരുത്തുലഭിക്കും.

നേരത്തെ ഒപ്പുവെച്ച കരാർ പ്രകാരം റഷ്യയിൽ നിന്നുള്ള ആദ്യഘട്ട എസ്-400 യൂണിറ്റുകൾ ഇന്ത്യൻ വ്യോമസേനയുടെ ഭാഗമായി വിന്യസിച്ചുകഴിഞ്ഞിട്ടുണ്ട്. ഇന്ത്യ 'സുദർശൻ' എന്ന് പേരിട്ടിരിക്കുന്ന ഈ മിസൈൽ പ്രതിരോധ സംവിധാനം അതിർത്തി മേഖലകളിലെ സുരക്ഷയിൽ നിർണായക പങ്കാണ് വഹിക്കുന്നത്. പാകിസ്ഥാൻ, ചൈന അതിർത്തികളിൽ നിന്നുള്ള വ്യോമ ഭീഷണികളെ ഒരേസമയം നേരിടാൻ കൂടുതൽ യൂണിറ്റുകൾ ആവശ്യമാണെന്ന വ്യോമസേനയുടെ വിലയിരുത്തലിന്റെ അടിസ്ഥാനത്തിലാണ് പുതിയ അഞ്ച് സ്ക്വാഡ്രണുകൾ കൂടി വാങ്ങാനുള്ള നീക്കത്തിന് കേന്ദ്ര സർക്കാർ അനുമതി നൽകിയത്.

ശത്രുവിമാനങ്ങൾ, ഡ്രോണുകൾ, ക്രൂയിസ് മിസൈലുകൾ, ബാലിസ്റ്റിക് മിസൈലുകൾ എന്നിവയെ ഏകദേശം 400 കിലോമീറ്റർ വരെ ദൂരത്തിൽ വെച്ച് ആകാശത്തുവെച്ചുതന്നെ തകർക്കാൻ ശേഷിയുള്ള അത്യാധുനിക സംവിധാനമാണ് എസ്-400. ഒരേസമയം നൂറുകണക്കിന് ലക്ഷ്യങ്ങളെ നിരീക്ഷിക്കാനും ഒന്നിലധികം ശത്രു മിസൈലുകളെ ഒരേസമയം ലക്ഷ്യമിട്ട് തകർക്കാനും ഇതിന് കഴിയും. ലോകത്തെ തന്നെ ഏറ്റവും മികച്ച ദീർഘദൂര വ്യോമപ്രതിരോധ സംവിധാനങ്ങളിലൊന്നായാണ് ഇത് കണക്കാക്കപ്പെടുന്നത്.

റഷ്യൻ പ്രതിരോധ ഏജൻസിയുടെ മറുപടി ലഭിച്ചതോടെ കരാറിന്റെ അടുത്ത ഘട്ടമായ വാണിജ്യ-സാങ്കേതിക ചർച്ചകളിലേക്ക് പ്രതിരോധ മന്ത്രാലയം കടക്കും. വിലപേശലുകൾക്കും സാങ്കേതിക പരിശോധനകൾക്കും ശേഷം കാബിനറ്റ് കമ്മിറ്റി ഓൺ സെക്യൂരിറ്റിയുടെ (CCS) അന്തിമ അനുമതി ലഭിക്കുന്നതോടെ ഔദ്യോഗിക കരാർ ഒപ്പുവെക്കും. വിതരണ ഷെഡ്യൂളും സ്പെയർ പാർട്സുകളുടെ ലഭ്യതയും സംബന്ധിച്ച വിശദാംശങ്ങളും വരും ആഴ്ചകളിൽ തീരുമാനിക്കും.

ഇന്ത്യ-റഷ്യ പ്രതിരോധ സഹകരണത്തിൽ നിർണായക നാഴികക്കല്ലാകുന്ന ഈ പുതിയ ഇടപാട് രാജ്യത്തിന്റെ വ്യോമാതിർത്തി സുരക്ഷയെ മറ്റൊരു തലത്തിലേക്ക് ഉയർത്തും. വടക്കൻ, പടിഞ്ഞാറൻ അതിർത്തികളിൽ പൂർണമായ വ്യോമപ്രതിരോധ കവചം തീർക്കാൻ പുതിയ സ്ക്വാഡ്രണുകളുടെ വരവ് വ്യോമസേനയെ സഹായിക്കും

---------------

Hindusthan Samachar / Roshith K