Lucknow , 04 ഓഗസ്റ്റ് (H.S.)

ലഖ്നൗ: പ്രതിപക്ഷാംഗങ്ങളുടെ ശക്തമായ ബഹളത്തിനും പ്രതിഷേധത്തിനുമിടെ ഉത്തർപ്രദേശ് നിയമസഭയിൽ 59,019.54 കോടി രൂപയുടെ നടപ്പു സാമ്പത്തിക വർഷത്തെ (2026-27) ആദ്യ ഉപധനാഭ്യർത്ഥന ബജറ്റ് അവതരിപ്പിച്ചു. സഭയുടെ മൺസൂൺ സെഷന്റെ രണ്ടാം ദിനമായ ചൊവ്വാഴ്ച ധനമന്ത്രി സുരേഷ് കുമാർ ഖന്നയാണ് ഉപധനാഭ്യർത്ഥനകൾ സഭയിൽ സമർപ്പിച്ചത്. അതേസമയം, സഭയിൽ പ്രതിപക്ഷം നടത്തുന്ന അപരിഷ്കൃതവും ഭരണഘടനാ വിരുദ്ധവുമായ പെരുമാറ്റത്തെയും പ്രതിഷേധങ്ങളെയും രൂക്ഷമായ ഭാഷയിലാണ് മുഖ്യമന്ത്രി യോഗി ആദിത്യനാഥ് വിമർശിച്ചത്.

ബജറ്റിലെ പ്രധാന നീക്കിവെപ്പുകൾ

അവതരിപ്പിച്ച ബജറ്റിൽ 17,399.50 കോടി രൂപ റവന്യൂ ചെലവിനായും 41,620.04 കോടി രൂപ മൂലധന ചെലവിനായുമാണ് മാറ്റിവെച്ചിരിക്കുന്നത്. ഇതിൽ 7,854.25 കോടി രൂപ പുതിയ പദ്ധതികൾക്കായാണ് നീക്കിവെച്ചിട്ടുള്ളത്. വ്യാവസായിക മേഖലയ്ക്കാണ് ബജറ്റിൽ ഏറ്റവും ഉയർന്ന തുക വകയിരുത്തിയിരിക്കുന്നത്.

-

വൻകിട-ഇടത്തരം വ്യവസായങ്ങൾ: 22,107.88 കോടി രൂപ

-

ഗ്രാമീണ വികസനം: 17,942.73 കോടി രൂപ

-

ഊർജ്ജ മേഖല: 7,422.27 കോടി രൂപ

-

ആരോഗ്യ-വൈദ്യശാസ്ത്ര സേവനങ്ങൾ: 2,025 കോടി രൂപ

-

സാമൂഹിക ക്ഷേമ വകുപ്പ്: 1,655 കോടി രൂപ

-

വനിതാ ക്ഷേമ വകുപ്പ്: 1,094.40 കോടി രൂപ

-

പൊതുമരാമത്ത് വകുപ്പ് (PWD): 700.01 കോടി രൂപ

സംസ്ഥാനത്തിന്റെ ധനകമ്മി നിശ്ചിത പരിധിക്കുള്ളിൽ തന്നെ നിലനിർത്താൻ സർക്കാരിന് സാധിച്ചിട്ടുണ്ടെന്ന് ധനമന്ത്രി സഭയെ അറിയിച്ചു. 2026-27 സാമ്പത്തിക വർഷത്തേക്ക് 9.13 ലക്ഷം കോടി രൂപയുടെ കൂറ്റൻ ബജറ്റാണ് ഈ വർഷം ഫെബ്രുവരിയിൽ യു.പി സർക്കാർ അവതരിപ്പിച്ചിരുന്നത്.

സഭയിൽ പ്രതിപക്ഷ ബഹളം

അയോധ്യയിലെ രാമക്ഷേത്രത്തിലെ വഴിപാട് പണം മോഷ്ടിക്കപ്പെട്ടുവെന്ന ആരോപണത്തിൽ അടിയന്തിര ചർച്ച വേണമെന്ന് ആവശ്യപ്പെട്ട് പ്രതിപക്ഷ നേതാവ് മാതാ പ്രസാദ് പാണ്ഡെയുടെ നേതൃത്വത്തിൽ സമാജ്വാദി പാർട്ടി (എസ്.പി) അംഗങ്ങൾ പ്രതിഷേധിച്ചതോടെയാണ് സഭയിൽ ബഹളം ആരംഭിച്ചത്. സ്പീക്കർ സതീഷ് മഹാന ചർച്ചയ്ക്ക് അനുമതി നിഷേധിച്ചതോടെ എസ്.പി അംഗങ്ങൾ സഭയുടെ നടുക്കളത്തിൽ (വെൽ) ഇറങ്ങി മുദ്രാവാക്യം വിളിച്ചു.

തുടർന്ന് സ്പീക്കർ സഭ താൽക്കാലികമായി നിർത്തിവെച്ചു. ഉച്ചയ്ക്ക് 12.20-ഓടെ സഭ വീണ്ടും ചേർന്നപ്പോഴും പ്രതിപക്ഷം ബഹളം തുടർന്നതിനിടയിലാണ് ധനമന്ത്രി ബജറ്റ് അവതരിപ്പിച്ചത്. നടുക്കളത്തിൽ നിന്നുള്ള പ്രസ്താവനകൾ സഭാ റെക്കോർഡിന്റെ ഭാഗമാകില്ലെന്നും സ്പീക്കർ വ്യക്തമാക്കി.

പ്രതിപക്ഷത്തിന് നേരെ യോഗി ആദിത്യനാഥിന്റെ കടുത്ത ആക്രമണം

സഭയിലെ പ്രതിപക്ഷ ബഹളത്തിനെതിരെ രൂക്ഷമായ ഭാഷയിലാണ് മുഖ്യമന്ത്രി യോഗി ആദിത്യനാഥ് പ്രതികരിച്ചത്. സമാജ്വാദി പാർട്ടിയുടെയും പ്രതിപക്ഷത്തിന്റെയും പെരുമാറ്റം അപരിഷ്കൃതവും ഭരണഘടനാ വിരുദ്ധവുമാണെന്ന് അദ്ദേഹം കുറ്റപ്പെടുത്തി.

ജനാധിപത്യ മൂല്യങ്ങളിൽ വിശ്വാസമില്ലാത്തവരാണ് പാർലമെന്ററി സമ്പ്രദായങ്ങളെയും സ്ഥാപനങ്ങളെയും അപമാനിക്കുന്നത്. സംസ്ഥാനത്തെ 25 കോടി ജനങ്ങളുടെ താൽപ്പര്യങ്ങളെയും വികാരങ്ങളെയും മുൻനിർത്തി കാര്യങ്ങൾ ചർച്ച ചെയ്യാനുള്ള സുവർണ്ണാവസരമാണ് പ്രതിപക്ഷം തടസ്സപ്പെടുത്തുന്നത്. സഭ ചേരുന്നതിന് മുന്നോടിയായി നടന്ന ഉപദേശക സമിതി യോഗത്തിൽ സഹകരിക്കാമെന്ന് സമ്മതിച്ചവർ ഇപ്പോൾ അനാവശ്യ വിഷയങ്ങൾ ഉന്നയിച്ച് സഭയുടെ വിലപ്പെട്ട സമയം പാഴാക്കുകയാണ്, യോഗി ആദിത്യനാഥ് പറഞ്ഞു.

പ്രതിപക്ഷ അംഗങ്ങൾ ജനങ്ങളുടെ നികുതിപ്പണം പാഴാക്കുകയാണെന്നും ഈ ജനാധിപത്യ വിരുദ്ധ പെരുമാറ്റം ഉത്തർപ്രദേശിലെ ജനങ്ങൾ കാണുന്നുണ്ടെന്നും മുഖ്യമന്ത്രി കൂട്ടിച്ചേർത്തു. അതേസമയം, ആഗസ്റ്റ് 6-ന് മൺസൂൺ സെഷന്റെ അവസാന ദിനത്തിൽ ഉപധനാഭ്യർത്ഥന ബജറ്റ് സഭ പാസാക്കുമെന്നാണ് കരുതപ്പെടുന്നത്.

---------------

Hindusthan Samachar / Roshith K