Newdelhi , 05 ഓഗസ്റ്റ് (H.S.)

ന്യൂഡൽഹി: ബംഗ്ലാദേശിൽ ഉണ്ടായ അതിശക്തമായ വിദ്യാർഥി പ്രക്ഷോഭത്തെ തുടർന്ന് അധികാരം ഒഴിഞ്ഞ് രാജ്യം വിടേണ്ടി വന്ന മുൻ പ്രധാനമന്ത്രി ഷെയ്ഖ് ഹസീന ഇന്ന് ആദ്യമായി പൊതുവേദിക്ക് മുന്നിലെത്തുന്നു. ഡൽഹിയിലെ ഫോറിൻ കറസ്പോണ്ടന്റ്സ് ക്ലബ് ഓഫ് സൗത്ത് ഏഷ്യ സംഘടിപ്പിക്കുന്ന വാർത്താ സമ്മേളനത്തിലൂടെയാണ് അവർ മാധ്യമങ്ങളെയും ലോകത്തെയും അഭിസംബോധന ചെയ്യുന്നത്. ഷെയ്ഖ് ഹസീന ബംഗ്ലാദേശിലെ ഭരണം ഉപേക്ഷിച്ച് ഇന്ത്യയിൽ അഭയം തേടി കൃത്യം രണ്ട് വർഷം തികയുന്ന വേളയിലാണ് ഈ സുപ്രധാന നീക്കം.

ഉയർന്ന സുരക്ഷാ ഭീഷണികളും നിയന്ത്രണങ്ങളും നിലനിൽക്കുന്നതിനാൽ ഓൺലൈൻ സംവിധാനം വഴിയായിരിക്കും ഷെയ്ഖ് ഹസീന മാധ്യമങ്ങൾക്ക് മുന്നിൽ പ്രത്യക്ഷപ്പെടുക. 2024 ഓഗസ്റ്റിൽ ഇന്ത്യയിൽ രാഷ്ട്രീയ അഭയം തേടിയതിന് ശേഷം ഇതാദ്യമായാണ് അവർ ഇത്തരമൊരു വാർത്താ സമ്മേളനത്തിൽ പങ്കെടുക്കുന്നത്. മാധ്യമ ഇടപെടലിലൂടെ സ്വന്തം രാജ്യമായ ബംഗ്ലാദേശിലേക്കുള്ള തിരിച്ചുവരവ് പദ്ധതികളും ഭാവി രാഷ്ട്രീയ കാഴ്ചപ്പാടുകളും അവർ വ്യക്തമാക്കിയേക്കുമെന്നാണ് സൂചനകൾ. ബംഗ്ലാദേശിലെ നിലവിലെ രാഷ്ട്രീയ സാഹചര്യങ്ങളെക്കുറിച്ചും രാജ്യത്തിന്റെ പുനർനിർമ്മാണത്തെക്കുറിച്ചുമുള്ള തന്റെ നിലപാടുകൾ അവർ ലോകത്തിന് മുന്നിൽ വിശദീകരിച്ചേക്കും.

അതേസമയം, ഡൽഹിയിൽ നടക്കുന്ന ഈ പരിപാടിയുമായി ഭരണകൂടത്തിന് യാതൊരുവിധ ബന്ധവുമില്ലെന്ന് കേന്ദ്ര സർക്കാർ ഔദ്യോഗികമായി വ്യക്തമാക്കിയിട്ടുണ്ട്. ഷെയ്ഖ് ഹസീനയുടെ പൊതുപരിപാടിയെ സംബന്ധിച്ച് നിലവിലെ ബംഗ്ലാദേശ് ഭരണകൂടം കടുത്ത ആശങ്ക രേഖപ്പെടുത്തിയതിന് തൊട്ടുപിന്നാലെയാണ് ഇന്ത്യ തങ്ങളുടെ നിലപാട് വ്യക്തമാക്കിയത്. പരിപാടി സംഘടിപ്പിക്കുന്നത് ഒരു സ്വതന്ത്ര മാധ്യമ കൂട്ടായ്മയാണെന്നും അതിൽ സർക്കാരിന് പങ്കില്ലെന്നുമാണ് ഇന്ത്യൻ നയതന്ത്ര വൃത്തങ്ങളുടെ വിശദീകരണം.

ബംഗ്ലാദേശിൽ നടന്ന പ്രക്ഷോഭങ്ങൾക്കും അക്രമങ്ങൾക്കും പിന്നാലെ രൂപീകരിച്ച ഇന്റർനാഷണൽ ക്രൈംസ് ട്രൈബ്യൂണൽ ഷെയ്ഖ് ഹസീനയ്ക്ക് വധശിക്ഷ വിധിച്ചിരുന്നു. മുൻ ഭരണാധികാരിയെ നിയമനടപടികൾക്കായി വിട്ടുനൽകണമെന്ന് ബംഗ്ലാദേശ് പലതവണ ഇന്ത്യയോട് ഔദ്യോഗികമായി ആവശ്യപ്പെട്ടിട്ടുണ്ടെങ്കിലും, ഈ വിഷയത്തിൽ ഇന്ത്യ ഇതുവരെ അന്തിമ തീരുമാനമെടുത്തിട്ടില്ല. ഇരുരാജ്യങ്ങളും തമ്മിലുള്ള നയതന്ത്ര ബന്ധത്തിൽ ഏറെ നിർണായകമായ ഈ വിഷയത്തിൽ വലിയ ജാഗ്രതയോടെയാണ് ഇന്ത്യ മുന്നോട്ടുപോകുന്നത്. ഈ പശ്ചാത്തലത്തിൽ ഷെയ്ഖ് ഹസീനയുടെ ഇന്നത്തെ പ്രതികരണങ്ങൾ അന്താരാഷ്ട്ര തലത്തിൽ തന്നെ വലിയ രാഷ്ട്രീയ ശ്രദ്ധ നേടുകയാണ്.

---------------

Hindusthan Samachar / Roshith K