Kozhikode, 06 ഓഗസ്റ്റ് (H.S.)

കോഴിക്കോട്: എലത്തൂരിനും പൂക്കാടിനും ഇടയിൽ ചരക്കു ട്രെയിനിന്റെ എൻജിൻ സാങ്കേതിക തകരാറിനെ തുടർന്ന് വഴിയിൽ നിന്നു പോയതോടെ കോഴിക്കോട് – വടകര പാതയിൽ ട്രെയിൻ ഗതാഗതം ഭാഗികമായി തടസ്സപ്പെട്ടു. വ്യാഴാഴ്ച ഉണ്ടായ സംഭവത്തെ തുടർന്ന് മലബാർ മേഖലയിലൂടെയുള്ള പ്രധാന ദീർഘദൂര പാസഞ്ചർ, എക്സ്പ്രസ് ട്രെയിനുകളുടെ ഓട്ടം അര മണിക്കൂറിലധികം വൈകി.

എലത്തൂർ റയിൽവേ സ്റ്റേഷന് സമീപം പൂക്കാട് ഭാഗത്തു വച്ചാണ് ചരക്കു ട്രെയിനിന് അപ്രതീക്ഷിതമായി സാങ്കേതിക തകരാർ സംഭവിച്ചത്. ട്രാക്കിന് നടുവിൽ എൻജിൻ പ്രവർത്തനം നിലച്ചതോടെ ഈ പാതയിലൂടെ കടന്നുപോകേണ്ടിയിരുന്ന മറ്റ് ട്രെയിനുകൾ നിർത്തിയിടേണ്ടി വന്നു. തകരാർ പരിഹരിക്കാൻ എൻജിൻ ഡ്രൈവറും സാങ്കേതിക പ്രവർത്തകരും ശ്രമിച്ചെങ്കിലും ഫലം കാണാത്തതിനെ തുടർന്നാണ് പുതിയ എൻജിൻ എത്തിക്കാൻ തീരുമാനിച്ചത്.

ഗതാഗത തടസ്സത്തെ തുടർന്ന് ഇതുവഴിയുള്ള പ്രധാന എക്സ്പ്രസ് ട്രെയിനുകൾ വിവിധ സ്റ്റേഷനുകളിൽ റയിൽവേ പിടിച്ചിട്ടു:

-

മംഗളൂരു – കോയമ്പത്തൂർ എക്സ്പ്രസ് കൊയിലാണ്ടി സ്റ്റേഷനിൽ നിർത്തിയിട്ടു.

-

മംഗളൂരു – കോയമ്പത്തൂർ ഇന്റർസിറ്റി സൂപ്പർ ഫാസ്റ്റ് എക്സ്പ്രസ് കൊയിലാണ്ടിയിൽ തന്നെ കാത്തു കിടക്കേണ്ടി വന്നു.

മറ്റ് ചില പാസഞ്ചർ സർവീസുകളും തൊട്ടടുത്തുള്ള ചെറിയ സ്റ്റേഷനുകളിൽ സിഗ്നൽ കിട്ടാതെ കിടന്നു. പെട്ടെന്നുണ്ടായ ഗതാഗത തടസ്സം മൂലം ഓഫീസ് ജീവനക്കാരും വിദ്യാർത്ഥികളും ഉൾപ്പെടെ നൂറുകണക്കിന് യാത്രക്കാരാണ് വിവിധ സ്റ്റേഷനുകളിൽ വലഞ്ഞത്.

വിവരമറിഞ്ഞ ഉടൻ തന്നെ കോഴിക്കോട് റയിൽവേ സ്റ്റേഷനിൽ നിന്നും മറ്റൊരു എൻജിൻ തകരാറിലായ ചരക്കു ട്രെയിനിന്റെ അടുക്കലേക്ക് തിരിച്ചു. പുതിയ എൻജിൻ ഘടിപ്പിച്ച് ചരക്കു ട്രെയിൻ സുരക്ഷിതമായി ട്രാക്കിൽ നിന്നും നീക്കിയ ശേഷമാണ് ഗതാഗതം പൂർണ്ണമായും പുനഃസ്ഥാപിക്കാൻ സാധിച്ചത്.

ഏതാണ്ട് ഒരു മണിക്കൂറോളം നീണ്ട പരിശ്രമത്തിനൊടുവിൽ തടസ്സം നീങ്ങുകയും പാത പൂർവസ്ഥിതിയിലാവുകയും ചെയ്തതായി റയിൽവേ വൃത്തങ്ങൾ അറിയിച്ചു. ട്രെയിനുകൾ ഒന്നൊന്നായി സർവീസ് പുനരാരംഭിച്ചെങ്കിലും മുൻ നിശ്ചയിച്ച സമയത്തേക്കാൾ വൈകിയാണ് പല ട്രെയിനുകളും ലക്ഷ്യസ്ഥാനത്ത് എത്തിച്ചേർന്നത്.

---------------

Hindusthan Samachar / Roshith K