New delhi, 06 ഓഗസ്റ്റ് (H.S.)

ഇലക്ട്രോണിക് പേയ്മെന്റ് രീതികള്‍ വഴിയുള്ള പണമിടപാടുകള്‍ക്ക് ചാര്‍ജ് ഈടാക്കാന്‍ ബാങ്കുകളെയും മറ്റ് സേവന ദാതാക്കളെയും അനുവദിക്കാന്‍ സര്‍ക്കാരിന് അധികാരം നല്‍കുന്ന ബില്‍ ലോക്സഭ പാസാക്കി. 'പേയ്മെന്റ് ആന്‍ഡ് സെറ്റില്‍മെന്റ് സിസ്റ്റംസ് ആക്ട്, 2007' ഭേദഗതി ചെയ്യുന്ന ബില്ലാണ് ലോക്സഭ പാസാക്കിയത്.

വിജ്ഞാപനം ചെയ്യപ്പെട്ട ഇലക്ട്രോണിക് പേയ്മെന്റ് രീതികളില്‍ 'മര്‍ച്ചന്റ് ഡിസ്‌കൗണ്ട് റേറ്റ്' (MDR) ഈടാക്കുന്നതില്‍ നിന്ന് ബാങ്കുകളെയും പേയ്മെന്റ് സേവന ദാതാക്കളെയും തടയുന്ന നിലവിലെ നിയമപരമായ വ്യവസ്ഥ നീക്കം ചെയ്യാനും ബില്‍ ലക്ഷ്യമിടുന്നു. RTGS, NEFT എന്നിവ വഴിയുള്ള തത്സമയ പണമിടപാടുകള്‍ക്ക് സേവന നിരക്ക് നല്‍കേണ്ടതുണ്ട്. എന്നാല്‍, ഇതുവരെ യുപിഐ ഇടപാടുകളെ ഇത്തരം നിരക്കുകളില്‍ നിന്ന് ഒഴിവാക്കിയിരുന്നു.

'പേയ്മെന്റ് ആന്‍ഡ് സെറ്റില്‍മെന്റ് സിസ്റ്റംസ് ആക്റ്റില്‍' നിര്‍ദ്ദേശിച്ചിട്ടുള്ള മാറ്റങ്ങള്‍, ചൊവ്വാഴ്ച സഭയില്‍ അവതരിപ്പിച്ച നികുതി സംബന്ധമായ സമഗ്ര നിയമനിര്‍മ്മാണത്തിന്റെ ഭാഗമാണ്. നേരത്തെ നിര്‍ത്തിവെച്ച സഭ ഉച്ചയ്ക്ക് 2 മണിക്ക് വീണ്ടും ചേര്‍ന്നതിന് ശേഷം ശബ്ദവോട്ടോടെയാണ് ലോക്സഭയില്‍ ബില്‍ പാസാക്കിയത്. സഭ വീണ്ടും ചേര്‍ന്നപ്പോള്‍ കേന്ദ്ര ധനമന്ത്രി നിര്‍മല സീതാരാമന്‍ 'ടാക്‌സേഷന്‍ ആന്‍ഡ് അദര്‍ ലോസ് (അമെന്‍ഡ്‌മെന്റ്) ബില്‍, 2026' പരിഗണനയ്ക്കായി അവതരിപ്പിച്ചു. 'പേയ്മെന്റ് ആന്‍ഡ് സെറ്റില്‍മെന്റ് സിസ്റ്റംസ് ആക്ട്, 2007', 'ആദായനികുതി നിയമം, 2025' എന്നിവയിലും 'ധനകാര്യ നിയമം, 2026'-ലും കൂടുതല്‍ ഭേദഗതികള്‍ വരുത്തുന്നതിനാണ് ഈ ബില്‍ ലക്ഷ്യമിടുന്നത്.

ഡിജിറ്റല്‍ പേയ്മെന്റ് സംവിധാനത്തിന് കരുത്തേകുന്ന ബാങ്കുകള്‍, പേയ്മെന്റ് സേവന ദാതാക്കള്‍ (PSPs), പേയ്മെന്റ് അടിസ്ഥാന സൗകര്യ കമ്പനികള്‍ എന്നിവയ്ക്ക് സുസ്ഥിരമായ വരുമാന മാതൃക ഉറപ്പാക്കുന്നതിനൊപ്പം, ഉപഭോക്താക്കള്‍ക്കും ചെറുകിട ബിസിനസുകള്‍ക്കും ഡിജിറ്റല്‍ പേയ്മെന്റ് സേവനങ്ങളില്‍ ചെറിയൊരു നിരക്ക് ഏര്‍പ്പെടുത്താനാണ് സര്‍ക്കാരിന്റെ ഈ നീക്കം ലക്ഷ്യമിടുന്നത്.

പേയ്മെന്റ് ആന്‍ഡ് സെറ്റില്‍മെന്റ് സിസ്റ്റംസ് ആക്റ്റ്, 2007-ലെ സെക്ഷന്‍ 10A-യില്‍ 'ആദായനികുതി നിയമം, 1961-ലെ സെക്ഷന്‍ 269SU പ്രകാരം നിഷ്‌കര്‍ഷിച്ചിട്ടുള്ള ഇലക്ട്രോണിക് പേയ്മെന്റ് രീതികള്‍' എന്ന വാക്കുകള്‍ക്കും അക്കങ്ങള്‍ക്കും അക്ഷരങ്ങള്‍ക്കും പകരം, 'കേന്ദ്രസര്‍ക്കാര്‍ വിജ്ഞാപനത്തിലൂടെ വ്യക്തമാക്കുന്ന ഒന്നോ അതിലധികമോ ഇലക്ട്രോണിക് പേയ്മെന്റ് രീതികള്‍' എന്ന് മാറ്റം വരുത്തണം. ഔദ്യോഗിക ഗസറ്റില്‍ ഈ നിയമം പ്രസിദ്ധീകരിക്കുന്ന തീയതി മുതല്‍ ഈ മാറ്റം പ്രാബല്യത്തില്‍ വരും എന്ന് ബില്ലില്‍ പറയുന്നു.

പേയ്മെന്റ് ആന്‍ഡ് സെറ്റില്‍മെന്റ് സിസ്റ്റംസ് ആക്റ്റ്, 2007-ലെ സെക്ഷന്‍ 10A പ്രകാരം, ഇലക്ട്രോണിക് പേയ്മെന്റുകള്‍ക്ക് ബാങ്കുകളും സിസ്റ്റം ദാതാക്കളും യാതൊരുവിധ ചാര്‍ജുകളും ഈടാക്കാന്‍ പാടില്ല. അതേസമയം, ആദായനികുതി നിയമത്തിലെ സെക്ഷന്‍ 269SU പ്രകാരം, 50 കോടി രൂപയില്‍ കൂടുതല്‍ വിറ്റുവരവുള്ള വലിയ ബിസിനസ് സ്ഥാപനങ്ങള്‍ രൂപേ ഡെബിറ്റ് കാര്‍ഡുകളും ഭീം യുപിഐ ക്യുആര്‍ കോഡുകളും ഉള്‍പ്പെടെയുള്ള പ്രത്യേക ഇലക്ട്രോണിക് രീതികളിലൂടെയുള്ള പേയ്മെന്റുകള്‍ സ്വീകരിക്കാന്‍ ബാധ്യസ്ഥരാണ്.

---------------

Hindusthan Samachar / Sreejith S