Newdelhi , 07 ഓഗസ്റ്റ് (H.S.)

ന്യൂഡൽഹി: രാജ്യത്തുടനീളം വലിയ പ്രതിഷേധങ്ങൾക്കിടയാക്കിയ നീറ്റ് (NEET-UG) ചോദ്യപേപ്പർ ചോർച്ചക്കേസിൽ പ്രതികൾ എങ്ങനെയാണ് ചോദ്യങ്ങൾ പുറത്തെത്തിച്ചതെന്ന് വ്യക്തമാക്കി കേന്ദ്ര അന്വേഷണ ഏജൻസിയായ സിബിഐ. കേസിലെ പ്രധാനികളായ ആദ്യ മൂന്ന് പ്രതികൾ അതിവിദഗ്ധമായാണ് ചോദ്യപേപ്പർ ചോർത്തിയതെന്ന് സിബിഐ സമർപ്പിച്ച കുറ്റപത്രത്തിൽ ചൂണ്ടിക്കാട്ടുന്നു. ചോദ്യപേപ്പർ തയാറാക്കാൻ നിയോഗിച്ച വിദഗ്ധ സമിതി അംഗങ്ങളായ പ്രതികൾ, പരീക്ഷാ കേന്ദ്രങ്ങളിൽ നിന്നും രഹസ്യമായി ചോദ്യങ്ങൾ കടത്തുകയായിരുന്നു.

94 പേജുകളുള്ള വിശദമായ കുറ്റപത്രത്തിലാണ് പരീക്ഷാ ചോദ്യങ്ങൾ ചോർത്തിയതിൻ്റെ ഞെട്ടിക്കുന്ന വിവരങ്ങൾ അന്വേഷണ സംഘം കൃത്യമായി രേഖപ്പെടുത്തിയിരിക്കുന്നത്. ഡൽഹി റൗസ് അവന്യൂ കോടതിയിലാണ് കുറ്റപത്രം സമർപ്പിച്ചിട്ടുള്ളത്.

ചോദ്യങ്ങൾ ചോർത്തിയത് വ്യത്യസ്ത മാർഗ്ഗങ്ങളിലൂടെ

വിഷയവിദഗ്ധരായ പ്രതികൾ തങ്ങളുടെ ജോലി പൂർത്തിയാക്കി മടങ്ങുന്നതിനിടെയാണ് ചോദ്യങ്ങൾ പുറത്തേക്ക് കടത്തിയത്. ബയോളജി, ഫിസിക്സ്, കെമിസ്ട്രി തുടങ്ങിയ വിഷയങ്ങളിലെ ചോദ്യങ്ങളാണ് ഇത്തരത്തിൽ ചോർത്തിയത്.

-

ചെറിയ കടലാസുകളിൽ രേഖപ്പെടുത്തി: പരീക്ഷാ ചോദ്യങ്ങളും അവയുടെ ഉത്തരങ്ങളും വളരെ ചെറിയ കടലാസുകളിൽ രഹസ്യമായി എഴുതിയെടുത്താണ് ചിലർ പുറത്തെത്തിച്ചത്.

-

ഓർത്തുവച്ച് കുറിച്ചെടുത്തു: മറ്റ് ചില പ്രതികൾ തങ്ങൾക്ക് നൽകിയ ചോദ്യങ്ങളും ഉത്തരങ്ങളും കൃത്യമായി മനസ്സിൽ ഓർത്തുവയ്ക്കുകയും, ജോലി കഴിഞ്ഞ് പുറത്തിറങ്ങിയ ശേഷം ഇവ കടലാസുകളിൽ കുറിച്ചെടുത്ത് സംഘത്തിലെ മറ്റുള്ളവർക്ക് കൈമാറുകയുമായിരുന്നു.

-

എൻസിഇആർടി പുസ്തകങ്ങളിൽ ചിഹ്നങ്ങളിട്ട്: നാഷണൽ കൗൺസിൽ ഓഫ് എഡ്യൂക്കേഷൻ റിസർച്ച ആൻഡ് ട്രെയിനിങ്ങിന്റെ (NCERT) പാഠപുസ്തകങ്ങളിൽ ചോദ്യങ്ങൾ ഉൾപ്പെടുന്ന പ്രസക്ത ഭാഗങ്ങൾ രേഖപ്പെടുത്തിയുമാണ് ചോദ്യപേപ്പർ പുറത്തേക്ക് കടത്തിയതെന്നും അന്വേഷണത്തിൽ കണ്ടെത്തി.

കോടികളുടെ സാമ്പത്തിക ഇടപാടുകൾ

ഇത്തരത്തിൽ പുറത്തെത്തിച്ച ചോദ്യങ്ങൾ ലക്ഷക്കണക്കിന് രൂപയ്ക്കാണ് വിവിധ കോച്ചിങ് സെന്ററുകൾക്കും ഇടനിലക്കാർക്കും മറിച്ചുവിറ്റത്. പരീക്ഷയ്ക്ക് മുൻപ് തന്നെ ചോദ്യങ്ങൾ ആവശ്യക്കാർക്ക് എത്തിച്ചുനൽകി വലിയ തുക തട്ടിയെടുക്കുന്ന ആസൂത്രിത ശൃംഖലയാണ് ഇതിനുപിന്നിൽ പ്രവർത്തിച്ചത്.

നാഷണൽ ടെസ്റ്റിംഗ് ഏജൻസിയുടെ (എൻടിഎ) വിശ്വസ്തതയെ ചോദ്യം ചെയ്ത സംഭവം പരീക്ഷാ നടത്തിപ്പിലെ സുരക്ഷാ വീഴ്ചകൾ വീണ്ടും ചർച്ചയാക്കിയിട്ടുണ്ട്. അഴിമതി നിരോധന നിയമം, പൊതുപരീക്ഷാ (അന്യായ മാർഗ്ഗങ്ങൾ തടയൽ) നിയമം ഉൾപ്പെടെയുള്ള കർശന വകുപ്പുകൾ ചുമത്തിയാണ് പ്രതികൾക്കെതിരെ കേസെടുത്തിരിക്കുന്നത്. കേസിൽ എൻടിഎ ഉദ്യോഗസ്ഥരുടെയോ മറ്റ് ഉന്നതരുടെയോ പങ്ക് ഇനിയും ഉൾപ്പെട്ടിട്ടുണ്ടോ എന്ന് കണ്ടെത്താൻ സിബിഐ കൂടുതൽ അന്വേഷണം തുടരുകയാണ്.

---------------

Hindusthan Samachar / Roshith K