Mumbai , 07 ഓഗസ്റ്റ് (H.S.)

മുംബൈ: ബിഹാറിലെ ബാങ്കിപ്പൂർ നിയമസഭാ ഉപതിരഞ്ഞെടുപ്പിൽ ബി.ജെ.പിയുടെ കോട്ട തകർത്ത് ചരിത്രവിജയം നേടിയതിന് തൊട്ടുപിന്നാലെ, ജന സുരാജ് പാർട്ടി തലവനും പ്രമുഖ രാഷ്ട്രീയ തന്ത്രജ്ഞനുമായ പ്രശാന്ത് കിഷോർ മഹാരാഷ്ട്ര ഉപമുഖ്യമന്ത്രിയും എൻ.സി.പി (അജിത് പവാർ വിഭാഗം) അധ്യക്ഷയുമായ സുനേത്ര പവാറുമായി കൂടിക്കാഴ്ച നടത്തി. മുംബൈയിലെ സുനേത്ര പവാറിന്റെ ഔദ്യോഗിക വസതിയായ 'ദേവ്ഗിരി'യിൽ മണിക്കൂറുകളോളം നീണ്ടുനിന്ന ഈ കൂടിക്കാഴ്ച മഹാരാഷ്ട്ര രാഷ്ട്രീയത്തിലും ദേശീയതലത്തിലും വലിയ ചർച്ചകൾക്ക് വഴിതുറന്നിരിക്കുകയാണ്.

അഭ്യൂഹങ്ങൾക്ക് വഴിവെച്ച് 'ദേവ്ഗിരി'യിലെ നീണ്ട ചർച്ച

സുനേത്ര പവാറിന്റെ മകനും എൻ.സി.പി നേതാവുമായ പാർത്ഥ് പവാറും യോഗത്തിൽ പങ്കെടുത്തു. അജിത് പവാറിന്റെ അപ്രതീക്ഷിത വിയോഗത്തിന് ശേഷം പാർട്ടി അധ്യക്ഷസ്ഥാനവും മഹാരാഷ്ട്രയിലെ എൻ.ഡി.എ സർക്കാരിൽ ഉപമുഖ്യമന്ത്രി പദവിയും ഏറ്റെടുത്ത സുനേത്ര പവാറുമായി പ്രശാന്ത് കിഷോർ നടത്തുന്ന രണ്ടാമത്തെ കൂടിക്കാഴ്ചയാണിത്. നേരത്തെയും ഇരുവരും തമ്മിൽ മുംബൈയിൽ ചർച്ച നടന്നിരുന്നു.

നിലവിൽ എൻ.സി.പിയുടെ സംഘടനാപരമായ ബലഹീനതകൾ പരിഹരിക്കുന്നതിനും പ്രതിച്ഛായ വീണ്ടെടുക്കുന്നതിനും ഒരു രാഷ്ട്രീയ ഉപദേശകന്റെ സഹായം പാർട്ടിക്ക് അനിവാര്യമാണെന്ന വിലയിരുത്തലിലാണ് പവാർ കുടുംബം. പാർത്ഥ് പവാറിന്റെ മുൻകൈയിലാണ് ഈ കൂടിക്കാഴ്ച നടന്നതെന്നാണ് വിവരം. സഖ്യകക്ഷിയായ ബി.ജെ.പിയുമായുള്ള ചില അഭിപ്രായവ്യത്യാസങ്ങളും പാർട്ടിക്കുള്ളിലെ ആഭ്യന്തര തർക്കങ്ങളും നിലനിൽക്കുന്ന സാഹചര്യത്തിൽ പ്രശാന്ത് കിഷോറിന്റെ സാന്നിധ്യം രാഷ്ട്രീയ പ്രാധാന്യമർഹിക്കുന്നു.

ബാങ്കിപ്പൂരിലെ അട്ടിമറി വിജയത്തിന് ശേഷമുള്ള രാഷ്ട്രീയ ചുവടുവെപ്പ്

കേന്ദ്രമന്ത്രി നിതിൻ നവീൻ രാജ്യസഭയിലേക്ക് തിരഞ്ഞെടുക്കപ്പെട്ടതിനെ തുടർന്ന് ഒഴിവുവന്ന ബാങ്കിപ്പൂർ മണ്ഡലത്തിൽ ബി.ജെ.പി സ്ഥാനാർത്ഥി നീരജ് സിംഗിനെ 19,000-ത്തിലധികം വോട്ടുകൾക്ക് പരാജയപ്പെടുത്തിയാണ് പ്രശാന്ത് കിഷോർ ജനപ്രതിനിധിയായി അരങ്ങേറിയത്. വർഷങ്ങളായി ബി.ജെ.പി കുത്തകയാക്കി വെച്ചിരുന്ന മണ്ഡലത്തിൽ നേടിയ ഈ വിജയം പ്രശാന്ത് കിഷോറിന്റെ രാഷ്ട്രീയ ഭാവിക്കും ജന സുരാജ് പാർട്ടിക്കും വൻ ഊർജ്ജമാണ് നൽകിയത്.

വിജയത്തിന് തൊട്ടുപിന്നാലെ മഹാരാഷ്ട്രയിലെ പ്രമുഖ നേതാക്കളുമായി അദ്ദേഹം നടത്തിയ കൂടിക്കാഴ്ച എൻ.സി.പിയുടെ ഭാവി തന്ത്രങ്ങൾ രൂപീകരിക്കുന്നതിൽ പ്രശാന്ത് കിഷോർ പങ്കാളിയാകുമെന്ന സൂചന നൽകുന്നു. അതേസമയം, ഇത് ഒരു സൗഹൃദ സന്ദർശനം മാത്രമാണെന്നും കുടുംബവുമായി പ്രശാന്ത് കിഷോറിനുള്ള പഴയ ബന്ധത്തിന്റെ ഭാഗമായാണ് കൂടിക്കാഴ്ചയെന്നുമാണ് പാർട്ടി വക്താക്കൾ ഔദ്യോഗികമായി വ്യക്തമാക്കുന്നത്.

എങ്കിലും, വരുന്ന തദ്ദേശ സ്വയംഭരണ തിരഞ്ഞെടുപ്പുകളിലും അടുത്ത നിയമസഭാ തിരഞ്ഞെടുപ്പിലും എൻ.സി.പിയുടെ തന്ത്രങ്ങൾ മെനയാൻ പ്രശാന്ത് കിഷോറിന്റെയോ അദ്ദേഹവുമായി ബന്ധപ്പെട്ട ഏജൻസികളുടെയോ സഹായം തേടാൻ സുനേത്ര പവാർ ആലോചിക്കുന്നതായി റിപ്പോർട്ടുകൾ സൂചിപ്പിക്കുന്നു.

---------------

Hindusthan Samachar / Roshith K