Newdelhi , 07 ഓഗസ്റ്റ് (H.S.)

ന്യൂഡൽഹി: രാജ്യത്തെ ആരോഗ്യ മേഖലയിൽ ചില ഡോക്ടർമാരും ഡയഗ്നോസ്റ്റിക് സെന്ററുകളും ലാബുകളും തമ്മിൽ നിലനിൽക്കുന്ന 'കട്ട് മണി', 'റഫറൽ കമ്മീഷൻ' ക്രമക്കേടുകൾക്കെതിരെ പാർലമെന്റിൽ ശബ്ദമുയർത്തി രാജ്യസഭാംഗം രാഘവ് ഛദ്ദ. രോഗികളെ ചികിത്സിക്കുന്നതിന് പകരം വ്യാജ റഫറലുകൾ നൽകി വൻ തുക കമ്മീഷനായി കൈപ്പറ്റുന്ന മാഫിയാ രീതി സാധാരണക്കാരായ രോഗികളുടെ ചികിത്സാച്ചെലവ് ഗണ്യമായി വർദ്ധിപ്പിക്കുകയാണെന്നും ഇതിനെതിരെ കേന്ദ്ര സർക്കാർ കർശന നടപടി സ്വീകരിക്കണമെന്നും അദ്ദേഹം രാജ്യസഭയിൽ ആവശ്യപ്പെട്ടു.

അവിശുദ്ധ കൂട്ടുകെട്ടും കമ്മീഷൻ സാമ്രാജ്യവും

രാജ്യസഭയിലെ ചർച്ചയ്ക്കിടെ സംസാരിക്കവെ, ഈ അവിശുദ്ധ കൂട്ടുകെട്ട് ഇന്ന് ആരോഗ്യ മേഖലയിൽ ഒരു സമാന്തര സാമ്പത്തിക വ്യവസ്ഥയായി രൂപപ്പെട്ടിരിക്കുകയാണെന്ന് രാഘവ് ഛദ്ദ ചൂണ്ടിക്കാട്ടി. രോഗിയെ ചികിത്സിക്കാനല്ല, മറിച്ച് ഒരു പ്രത്യേക ലാബിലേക്ക് റഫർ ചെയ്യുന്നതിന് മാത്രം ഡോക്ടറുടെ പോക്കറ്റിലേക്ക് 3,000 രൂപ വരെ എത്തുന്ന സാഹചര്യമുണ്ട്. കൃത്യമായ കമ്മീഷൻ നിരക്കുകളും ഏജന്റുമാരും ഇതിനായി പ്രവർത്തിക്കുന്നുണ്ട്, എന്ന് അദ്ദേഹം ആരോപിച്ചു.

ഔദ്യോഗിക കണക്കുകളിൽ ഈ കമ്മീഷൻ തുക വെളിപ്പെടുത്താറില്ല. ഡയഗ്നോസ്റ്റിക് സെന്ററുകളുടെ അക്കൗണ്ടുകളിൽ ഇത് 'മാർക്കറ്റിംഗ് ചെലവ്' (Marketing Expense) എന്നും ഡോക്ടർമാരുടെ ഭാഗത്ത് 'റഫറൽ കമ്മീഷൻ' എന്നുമാണ് രേഖപ്പെടുത്തുന്നത്. ലാബ് പരിശോധനകളുടെ ആകെ തുകയുടെ നിശ്ചിത ശതമാനമാണ് കമ്മീഷനായി നൽകുന്നത്. ചില സന്ദർഭങ്ങളിൽ ഡോക്ടർമാർക്ക് വിദേശ യാത്രകൾ വരെ ഓഫർ ചെയ്യാറുണ്ടെന്നും അദ്ദേഹം വെളിപ്പെടുത്തി.

രോഗികൾക്ക് 15 മുതൽ 20 ശതമാനം വരെ അധിക സാമ്പത്തിക ഭാരം

ഡോക്ടർമാർക്കും ലാബുകൾക്കുമിടയിലുള്ള ഈ കട്ട് മണി തുകയുടെ ഭാരം ആത്യന്തികമായി ചെന്നുപതിക്കുന്നത് പാവപ്പെട്ട രോഗികളുടെ തലയിലാണ്. ഡയഗ്നോസ്റ്റിക് സെന്ററുകൾ ഈ കമ്മീഷൻ തുക രോഗികളുടെ ബില്ലിലാണ് ഉൾപ്പെടുത്തുന്നത്. ഇന്ത്യൻ ജേണൽ ഓഫ് മെഡിക്കൽ എത്തിക്സിന്റെ വിവരങ്ങൾ ഉദ്ധരിച്ച് സംസാരിച്ച രാഘവ് ഛദ്ദ, ഇത്തരം റഫറൽ കമ്മീഷനുകൾ കാരണം രോഗികളുടെ ചികിത്സാ ബില്ലിൽ 15 മുതൽ 20 ശതമാനം വരെ വർദ്ധനവുണ്ടാകുന്നുണ്ടെന്ന് വ്യക്തമാക്കി.

ബില്ല തുക ഉയരുന്നത് മാത്രമല്ല, ആവശ്യമില്ലാത്ത വൈദ്യപരിശോധനകളും (Unnecessary medical tests) അനാവശ്യ റഫറലുകളും വർദ്ധിക്കുന്നതാണ് ഏറ്റവും വലിയ പ്രത്യാഘാതം. ടയർ-2, ടയർ-3 നഗരങ്ങളിലാണ് ഈ പ്രവണത കൂടുതൽ രൂക്ഷമായി കണ്ടുവരുന്നത്.

നിയമങ്ങൾ കാറ്റിൽപ്പറത്തുന്നു

2002-ലെ മെഡിക്കൽ കൗൺസിൽ ഓഫ് ഇന്ത്യയുടെ കോഡ് ഓഫ് എത്തിക്സ് പ്രകാരം 'ഫീ വിഭജനം' (Fee splitting) കർശനമായി നിരോധിച്ചിട്ടുള്ളതാണെന്ന് അദ്ദേഹം ഓർമ്മിപ്പിച്ചു. കൂടാതെ, നാഷണൽ മെഡിക്കൽ കമ്മീഷന്റെ 2023-ലെ ചട്ടങ്ങൾ പ്രകാരവും റഫറൽ കമ്മീഷനുകൾ നിരോധിച്ചിട്ടുണ്ട്. ചട്ടം ലംഘിക്കുന്ന ഡോക്ടർമാരുടെ ലൈസൻസ് ഒന്നു മുതൽ മൂന്ന് മാസം വരെ സസ്പെൻഡ് ചെയ്യാനും ഗുരുതര വീഴ്ചകളിൽ വഞ്ചനാക്കുറ്റം, ഗൂഢാലോചന, ഉപഭോക്തൃ സംരക്ഷണ നിയമങ്ങൾ എന്നിവ ചുമത്താനും വ്യവസ്ഥയുണ്ട്. എന്നാൽ ഇതൊന്നും പ്രായോഗികതലത്തിൽ കൃത്യമായി നടപ്പിലാകുന്നില്ല.

രോഗികൾ ശ്രദ്ധിക്കേണ്ട മുന്നറിയിപ്പുകൾ ('Red Flags')

രോഗികൾ ജാഗ്രത പാലിക്കേണ്ട ചില പ്രധാന ലക്ഷണങ്ങളും അദ്ദേഹം പങ്കുവെച്ചു:

-

ഒരു പ്രത്യേക ഡയഗ്നോസ്റ്റിക് സെന്ററിലേക്ക് തന്നെ പോകാൻ ഡോക്ടർ അമിതമായി നിർബന്ധിക്കുക.

-

അംഗീകാരമുള്ള മറ്റൊരു ലാബിൽ നിന്ന് പരിശോധന നടത്തിയതിന് ഡോക്ടർ അസംതൃപ്തി പ്രകടിപ്പിക്കുക.

-

ക്ലിനിക്കുകളിൽ ചില ഡയഗ്നോസ്റ്റിക് സെന്ററുകളുടെ പരസ്യ സാമഗ്രികളോ എക്സിക്യൂട്ടീവുകളെയോ കാണുക.

നാട്ടിലെ ഭൂരിഭാഗം ഡോക്ടർമാരും ദൈവതുല്യമായ സേവനമനോഭാവത്തോടെയാണ് പ്രവർത്തിക്കുന്നതെന്നും, എന്നാൽ ചുരുക്കം ചിലർ ഈ അവിശുദ്ധ വ്യവസ്ഥയുടെ ഭാഗമാകുന്നത് വൈദ്യശാസ്ത്ര മേഖലയുടെ പവിത്രത തകർക്കുകയാണെന്നും അദ്ദേഹം കൂട്ടിച്ചേർത്തു. അതിനാൽ സുതാര്യത ഉറപ്പാക്കാനും രോഗികളെ അനാവശ്യ സാമ്പത്തിക ചൂഷണത്തിൽ നിന്ന് രക്ഷിക്കാനും അടിയന്തര നടപടി വേണമെന്ന് അദ്ദേഹം സർക്കാരിനോട് അഭ്യർത്ഥിച്ചു.

---------------

Hindusthan Samachar / Roshith K