Newdelhi, 09 ഓഗസ്റ്റ് (H.S.)

ന്യൂഡൽഹി: ഡൽഹി സർക്കാറിന്റെ 2024-25 സാമ്പത്തിക വർഷത്തെ ധനസ്ഥിതിയെക്കുറിച്ചുള്ള കൺട്രോളർ ആൻഡ് ഓഡിറ്റർ ജനറലിന്റെ (CAG) നിർണ്ണായക റിപ്പോർട്ട് തിങ്കളാഴ്ച നിയമസഭയുടെ മേശപ്പുറത്തുവെക്കും. ഡൽഹി മുഖ്യമന്ത്രി രേഖ ഗുപ്തയാണ് സി.എ.ജി റിപ്പോർട്ട് സഭയിൽ സമർപ്പിക്കുന്നത്. തിങ്കളാഴ്ച രാവിലെ 11 മണിക്ക് നിയമസഭാ നടപടികൾ ആരംഭിക്കുമ്പോൾ സഭാ അജണ്ടയിലെ പ്രധാന വിഷയങ്ങളിലൊന്നായി ഇത് പരിഗണിക്കും.

നിയമസഭാ സമ്മേളനത്തിന്റെ തുടക്കത്തിൽ റൂൾ-280 പ്രകാരം ജനശ്രദ്ധയാകർഷിക്കുന്ന പൊതു പ്രാധാന്യമുള്ള അടിയന്തര വിഷയങ്ങൾ ഉന്നയിക്കാൻ അംഗങ്ങൾക്ക് സ്പീക്കർ സമയം അനുവദിക്കും. ഇതിന് ശേഷമായിരിക്കും ധനകാര്യ റിപ്പോർട്ട് ഉൾപ്പെടെയുള്ള പ്രധാന രേഖകൾ സഭയിൽ സമർപ്പിക്കപ്പെടുക.

ഭരണപരിഷ്കാരങ്ങൾക്കായി പുതിയ ബില്ലുകൾ സഭയിൽഭരണനിർവ്വഹണം കൂടുതൽ കാര്യക്ഷമമാക്കുന്നതിനും സേവനങ്ങൾ വേഗത്തിൽ ജനങ്ങളിലെത്തിക്കുന്നതിനുമായി പ്രമുഖ ബില്ലുകളും തിങ്കളാഴ്ച സഭയുടെ പരിഗണനയ്ക്ക് വരും. ഐ.ടി വകുപ്പ് മന്ത്രി പങ്കജ് കുമാർ സിംഗ് 'ദി ഡൽഹി (റൈറ്റ് ഓഫ് സിറ്റിസൺ ടു ടൈം ബൗണ്ട് ആൻഡ് ഈസ് ഓഫ് ഡെലിവറി ഓഫ് സർവീസസ്) ബിൽ 2026' സഭയിൽ അവതരിപ്പിക്കും. പൊതുജനങ്ങൾക്ക് സർക്കാർ സേവനങ്ങൾ നിശ്ചിത സമയപരിധിക്കുള്ളിൽ സുതാര്യമായി ലഭ്യമാക്കാനുള്ള നിയമപരമായ ചട്ടക്കൂട് ഒരുക്കുകയാണ് ഈ ബില്ലിലൂടെ ലക്ഷ്യമിടുന്നത്.

കൂടാതെ, ടൂറിസം മന്ത്രി കപിൽ മിശ്ര ഓഗസ്റ്റ് 7-ന് സഭയിൽ അവതരിപ്പിച്ച 'ദി ഡൽഹി ബെഡ് ആൻഡ് ബ്രേക്ക്ഫാസ്റ്റ് എസ്റ്റാബ്ലിഷ്മെന്റ്സ് (റിപ്പീൽ) ബിൽ 2026' തിങ്കളാഴ്ച സഭയുടെ ചർച്ചയ്ക്കും അംഗീകാരത്തിനുമായി മുന്നോട്ടുവെക്കും. സഭാ നടപടികളുടെ സുഗമമായ നടത്തിപ്പിനായി ബിസിനസ് അഡ്വൈസറി കമ്മിറ്റിയുടെ അഞ്ചാം റിപ്പോർട്ട് ഡെപ്യൂട്ടി സ്പീക്കർ മോഹൻ സിംഗ് ബിഷ്ടും എം.എൽ.എ അഭയ് വർമ്മയും ചേർന്ന് സഭയിൽ അവതരിപ്പിക്കും.

'ഡൽഹി ലക്ഷ്മി യോജന' ചർച്ചയും മറ്റ് നടപടികളുംതലസ്ഥാനത്തെ സ്ത്രീകളുടെ ക്ഷേമം ലക്ഷ്യമിട്ട് നടപ്പിലാക്കിയ 'ഡൽഹി ലക്ഷ്മി യോജന' പദ്ധതിയുമായി ബന്ധപ്പെട്ട് അംഗം ശിഖ റോയി മുന്നോട്ടുവെച്ച അഭിനന്ദന പ്രമേയത്തിന്മേലുള്ള ചർച്ചയും സഭയിൽ തുടരും. മുൻപ് സഭയുടെ മേശപ്പുറത്തുവെച്ച മാർച്ച് 2023-ൽ അവസാനിച്ച സാമ്പത്തിക വർഷത്തെ സി.എ.ജി ഓഡിറ്റ് റിപ്പോർട്ടിന്റെ തുടർചർച്ചകളും തിങ്കളാഴ്ച നടക്കുമെന്നാണ് പ്രതീക്ഷിക്കുന്നത്.

ഡൽഹി സഭാ സ്പീക്കർ വിജേന്ദർ ഗുപ്തയുടെ അധ്യക്ഷതയിൽ ചേർന്ന ബിസിനസ് അഡ്വൈസറി കമ്മിറ്റി യോഗത്തിൽ സി.എ.ജിയുടെ രണ്ട് പ്രധാന ഓഡിറ്റ് റിപ്പോർട്ടുകളും ഡൽഹി ഇലക്ട്രിസിറ്റി റെഗുലേറ്ററി കമ്മീഷന്റെ (DERC) വിജ്ഞാപനങ്ങളും സഭയിൽ വിശദമായി ചർച്ച ചെയ്യാൻ തീരുമാനിച്ചിരുന്നു. പബ്ലിക് സർവീസ് ഡെലിവറി, ഡൽഹി അർബൻ ഷെൽട്ടർ ഇംപ്രൂവ്മെന്റ് ബോർഡ് എന്നിവയുമായി ബന്ധപ്പെട്ട തന്ത്രപ്രധാന നിയമനിർമ്മാണങ്ങളോടെ സഭാ സമ്മേളനം കൂടുതൽ ചൂടേറിയ ചർച്ചകൾക്ക് സാക്ഷ്യം വഹിക്കും.

---------------

Hindusthan Samachar / Roshith K