Enter your Email Address to subscribe to our newsletters
Thiruvanathapuram, 10 സെപ്റ്റംബര് (H.S.)
സംസ്ഥാനത്ത് വരും ദിവസങ്ങളില് പരക്കെ മഴയ്ക്ക് സാധ്യത. ബംഗാള് ഉള്ക്കടലിന്റെ വടക്കുഭാഗത്തായി പുതിയ ന്യൂനമര്ദം രൂപപ്പെട്ടതിന്റെ സ്വാധീനത്തിലാണ് മഴ ലഭിക്കുമെന്ന പ്രവചനം. ഇന്ന് മുതല് മൂന്ന് ദിവസത്തേക്ക് വിവിധ ജില്ലകളില് കേന്ദ്ര കാലാവസ്ഥ വകുപ്പ് മഞ്ഞ അലര്ട്ട് പ്രഖ്യാപിച്ചു.
ഇന്ന് രാവിലെയാണ് ന്യൂനമര്ദം രൂപപ്പെട്ടത്. വരും മണിക്കൂറുകളില് ഇത് കൂടുതല് ശക്തിപ്രാപിക്കാന് സാധ്യതയുണ്ടെന്നാണ് വിലയിരുത്തല്. ഇതിന്റെ പശ്ചാത്തലത്തില് ഒറ്റപ്പെട്ട ശക്തമായ മഴയാണ് പ്രവചിക്കുന്നത്. ഇന്ന് ആലപ്പുഴ, എറണാകുളം ജില്ലകളിലും നാളെ പത്തനംതിട്ട, കോട്ടയം, ഇടുക്കി, എറണാകുളം ജില്ലകളിലുമാണ് മഞ്ഞ അലര്ട്ട് പ്രഖ്യാപിച്ചിട്ടുള്ളത്. പന്ത്രണ്ടിന് പത്തനംതിട്ട, ഇടുക്കി, എറണാകുളം, പാലക്കാട് ജില്ലകളിലും മുന്നറിയിപ്പുണ്ട്.
ഇരുപത്തിനാല് മണിക്കൂറില് 64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അര്ഥമാക്കുന്നത്. താഴ്ന്ന പ്രദേശങ്ങളിലും നദീതീരങ്ങളിലും താമസിക്കുന്നവര് പ്രത്യേക ജാഗ്രത പാലിക്കണമെന്ന് ദുരന്തനിവാരണ അതോറിറ്റി നിര്ദേശിച്ചു. മോശം കാലാവസ്ഥയ്ക്കും ശക്തമായ കാറ്റിനും സാധ്യതയുള്ളതിനാല് തീരദേശവാസികളും ജാഗ്രത പാലിക്കണം.
മഴ മുന്നറിയിപ്പുകള്ക്കിടയിലും സംസ്ഥാനത്തെ പല ജില്ലകളിലും ഉയര്ന്ന താപനില തുടരുകയാണ്. പുനലൂര്, കോട്ടയം, കൊച്ചി, തിരുവനന്തപുരം എന്നിവിടങ്ങളിലാണ് തുടര്ച്ചയായി കൂടിയ ചൂട് രേഖപ്പെടുത്തുന്നത്. പസഫിക് സമുദ്രത്തില് രൂപപ്പെടുന്ന എല്നിനോ പ്രതിഭാസം കേരളത്തിന്റെ കാലാവസ്ഥയെ വലിയ രീതിയില് ബാധിച്ചിട്ടുണ്ട്. സമീപവര്ഷങ്ങളില് കാണാത്ത കടുത്ത ചൂടാണ് ഈ സെപ്റ്റംബര് മാസത്തില് അനുഭവപ്പെടുന്നത്. താപനില മൂന്ന് മുതല് നാല് ഡിഗ്രി സെല്ഷ്യസ് വരെ ഉയര്ന്നേക്കാമെന്ന കാലാവസ്ഥ വകുപ്പിന്റെ മുന്നറിയിപ്പ് ഗൗരവത്തോടെ കാണേണ്ടതുണ്ട്. ഇതിനൊപ്പം അന്തരീക്ഷ ആര്ദ്രത ഉയര്ന്നുനില്ക്കുന്നത് ജനങ്ങളില് വലിയ അസ്വസ്ഥതയാണ് ഉണ്ടാക്കുന്നത്. പകല് സമയങ്ങളില് പുറത്തിറങ്ങുന്നവര് നിര്ജ്ജലീകരണം ഒഴിവാക്കാന് ധാരാളം വെള്ളം കുടിക്കണമെന്നും ആരോഗ്യവകുപ്പ് നിര്ദേശിക്കുന്നു.
സംസ്ഥാനത്ത് ലഭിക്കേണ്ട കാലവര്ഷത്തില് ഇതുവരെ 25 ശതമാനത്തിന്റെ കുറവാണ് രേഖപ്പെടുത്തിയിട്ടുള്ളത്. ഇത് ഏറെ ആശങ്കപ്പെടുത്തുന്ന കാര്യമാണ്. വയനാട് ജില്ലയിലാണ് ഏറ്റവും വലിയ പ്രതിസന്ധിയുള്ളത്. സാധാരണ ലഭിക്കേണ്ടതിന്റെ പകുതി മഴ പോലും ഇവിടെ ലഭിച്ചിട്ടില്ല. 52 ശതമാനം മഴക്കുറവാണ് വയനാട്ടില് രേഖപ്പെടുത്തിയത്.
---------------
Hindusthan Samachar / Sreejith S
