Newdelhi, 24 സെപ്റ്റംബര് (H.S.)

ഇന്ത്യൻ ആർമി ഡെന്റല് കോർപ്സില് ഷോർട്ട് സർവീസ് കമ്മീഷൻ വഴി ഉദ്യോഗസ്ഥരെ നിയമിക്കുന്നതിനുള്ള വിജ്ഞാപനം പുറത്തുവന്നു.

ഡയറക്ടർ ജനറല് ആംഡ് ഫോഴ്സസ് മെഡിക്കല് സർവീസസിന് കീഴിലുള്ള ആകെ 37 ഒഴിവുകളിലേക്കാണ് ഇപ്പോള് അപേക്ഷ ക്ഷണിച്ചിരിക്കുന്നത്. താല്പ്പര്യമുള്ള ഉദ്യോഗാർത്ഥികള് ഒക്ടോബർ 22-നകം ഓണ്ലൈനായി അപേക്ഷ സമർപ്പിക്കേണ്ടതാണ്.

ഈ പദവിയിലേക്ക് അപേക്ഷിക്കാൻ അംഗീകൃത സ്ഥാപനത്തില് നിന്നുള്ള ബി.ഡി.എസ് ബിരുദം അല്ലെങ്കില് എം.ഡി.എസ് യോഗ്യത ഉണ്ടായിരിക്കണം. ഏതെങ്കിലും സംസ്ഥാന ഡെന്റല് കൗണ്സിലില് രജിസ്റ്റർ ചെയ്ത ഡെന്റല് പ്രാക്ടീഷണർ ആയിരിക്കേണ്ടതും, ആ രജിസ്ട്രേഷൻ സർട്ടിഫിക്കറ്റിന് 2026 ഡിസംബർ 31 വരെ സാധുത ഉണ്ടായിരിക്കേണ്ടതുമാണ്. കൂടാതെ, 2026 ജൂണ് 30-നകം നിർബന്ധിത ഒരു വർഷത്തെ കമ്പള്സറി റൊട്ടേറ്ററി ഇന്റേണ്ഷിപ്പ് പൂർത്തിയാക്കിയിരിക്കണം. 2026 മേയ് 2-ന് നടന്ന NEET (MDS)-2026 പരീക്ഷയില് നിർബന്ധമായും പങ്കെടുത്തിട്ടുള്ളവർക്ക് മാത്രമാണ് അപേക്ഷിക്കാൻ അവസരമുള്ളത്.

2026 ഡിസംബർ 31-ലെ കണക്കുപ്രകാരം ഉദ്യോഗാർത്ഥികള്ക്ക് പരമാവധി 45 വയസ്സ് കവിയാൻ പാടില്ല. എന്നാല് സർക്കാർ ചട്ടപ്രകാരമുള്ള വയസ്സിളവ് അർഹരായ ഉദ്യോഗാർത്ഥികള്ക്ക് ലഭിക്കും. തെരഞ്ഞെടുക്കപ്പെടുന്നവർക്ക് ക്യാപ്റ്റൻ റാങ്കിലാണ് നിയമനം ലഭിക്കുന്നത്. ഏഴാം ശമ്പള കമ്മീഷൻ ലെവല് 10B പ്രകാരം 61,300 മുതല് 1,20,900 രൂപ വരെയാണ് അടിസ്ഥാന ശമ്പളം. ഇതിനുപുറമേ നോണ്-പ്രാക്ടീസിങ് അലവൻസ്, ഡി.എ, എച്ച്.ആർ.എ തുടങ്ങിയ ആനുകൂല്യങ്ങളും സർവീസ് വ്യവസ്ഥകള് അനുസരിച്ച് മറ്റ് അലവൻസുകളും ലഭിക്കുന്നതാണ്.

NEET (MDS)-2026 സ്കോറിന്റെ അടിസ്ഥാനത്തിലായിരിക്കും ഉദ്യോഗാർത്ഥികളെ പ്രാഥമികമായി ഷോർട്ട്ലിസ്റ്റ് ചെയ്യുന്നത്. ഒരു ഒഴിവിലേക്ക് 10 പേർ എന്ന അനുപാതത്തില് ഡല്ഹിയില് നടക്കുന്ന അഭിമുഖത്തിനായി ഉദ്യോഗാർത്ഥികളെ വിളിക്കും. അഭിമുഖത്തിലെ പ്രകടനത്തിന്റെ അടിസ്ഥാനത്തിലാണ് അന്തിമ മെറിറ്റ് ലിസ്റ്റ് തയ്യാറാക്കുന്നത്. ഇതില് വിജയിക്കുന്നവർ ആംഡ് ഫോഴ്സസ് മെഡിക്കല് സർവീസസിന്റെ വൈദ്യപരിശോധന കൂടി വിജയകരമായി പൂർത്തിയാക്കേണ്ടതുണ്ട്.

---------------

Hindusthan Samachar / CHANDHU CHANDRASEKHAR