Kochi, 24 സെപ്റ്റംബര് (H.S.)

കൊച്ചി: മലയാളികളുടെ തീൻമേശകളിലെ പ്രധാന വിഭവവും ഏറെ ജനപ്രിയവുമായ ചൂര മീനിൽ വിരകളെ കണ്ടെത്തിയെന്ന വാർത്തകൾക്കിടെ മത്സ്യപ്രേമികൾക്ക് ആശ്വാസവുമായി കേന്ദ്ര സമുദ്രമത്സ്യ ഗവേഷണ സ്ഥാപനം (സി.എം.എഫ്.ആർ.ഐ). ഇന്ത്യൻ തീരങ്ങളിൽ നിന്ന് ലഭിക്കുന്ന ചൂര മത്സ്യം തികച്ചും സുരക്ഷിതമാണെന്നും ഉപഭോക്താക്കൾക്ക് യാതൊരുവിധ ആശങ്കയും വേണ്ടെന്നും ശാസ്ത്രജ്ഞർ വ്യക്തമാക്കി. രാജ്യത്തെ വിവിധ തീരങ്ങളിൽ നിന്ന് ശേഖരിച്ച സാമ്പിളുകൾ വിശദമായി പരിശോധിച്ചതിൽ മനുഷ്യന്റെ ആരോഗ്യത്തിന് ഹാനികരമാകുന്ന തരത്തിലുള്ള പരാദ ജീവികളുടെ സാന്നിധ്യം കണ്ടെത്തിയിട്ടില്ലെന്ന് അധികൃതർ അറിയിച്ചു.

തെക്കൻ ബ്രസീലിലെ തീരമേഖലകളിൽ നിന്ന് പിടിച്ച ചൂര മീനുകളിൽ നടത്തിയ പ്രത്യേക പഠനത്തിലാണ് വിരകളുടെ സാന്നിധ്യം ആദ്യമായി സ്ഥിരീകരിച്ചത്. ഈ റിപ്പോർട്ടുകൾ പുറത്തുവന്നതോടെയാണ് കേരളത്തിലടക്കമുള്ള മത്സ്യവിപണിയിലും ഉപഭോക്താക്കൾക്കിടയിലും വലിയ ആശങ്ക പടർന്നത്. എന്നാൽ, വിദേശത്ത് നടന്ന പ്രാദേശിക പഠനത്തെ ഇന്ത്യൻ സാഹചര്യങ്ങളുമായി കൂട്ടിക്കുഴക്കേണ്ടതില്ലെന്നും ശാസ്ത്രീയ പരിശോധനകളിൽ ഇന്ത്യൻ തീരങ്ങളിലെ ചൂരയിൽ പരാദബാധ കണ്ടെത്തിയിട്ടില്ലെന്നും സി.എം.എഫ്.ആർ.ഐ ഡയറക്ടർ ഡോ. ഗ്രീൻസൺ ജോർജ് വ്യക്തമാക്കി.

ഇന്ത്യൻ സമുദ്രമേഖലയിലെ ജലഗുണനിലവാരവും ആവാസവ്യവസ്ഥയും വിദേശ രാജ്യങ്ങളിലെ തീരങ്ങളിൽ നിന്ന് തികച്ചും വ്യത്യസ്തമാണ്. സി.എം.എഫ്.ആർ.ഐയുടെ കീഴിൽ പ്രവർത്തിക്കുന്ന വിദഗ്ധ സംഘം കേരളം ഉൾപ്പെടെയുള്ള തീരദേശ സംസ്ഥാനങ്ങളിൽ നിന്നുള്ള ചൂര മത്സ്യങ്ങളുടെ ഗുണനിലവാരം നിരന്തരം നിരീക്ഷിക്കുന്നുണ്ട്. നിലവിലെ സാഹചര്യത്തിൽ ആളുകൾക്ക് ചൂര മത്സ്യം നിശ്ചിത സുരക്ഷാമാനദണ്ഡങ്ങൾ പാലിച്ച് ധൈര്യമായി ഉപയോഗിക്കാമെന്നും വിദഗ്ധർ സാക്ഷ്യപ്പെടുത്തുന്നു.

മത്സ്യങ്ങൾ ഏതുമാകട്ടെ, അവ കഴിക്കുമ്പോൾ അടിസ്ഥാനപരമായ ശുചിത്വവും പാചക മുൻകരുതലുകളും പാലിക്കേണ്ടതുണ്ടെന്ന് വിദഗ്ധർ ഓർമ്മിപ്പിക്കുന്നുണ്ട്:

- ശരിയായ രീതിയിൽ കഴുകി വൃത്തിയാക്കുക: മത്സ്യം വാങ്ങിയ ഉടൻ തന്നെ വയറിന്റെ ഉൾഭാഗങ്ങളും മറ്റ് ആന്തരിക അവയവങ്ങളും നീക്കം ചെയ്ത് ശുദ്ധജലത്തിൽ നന്നായി കഴുകണം.

- പൂർണമായി വേവിക്കുക: ഉയർന്ന ചൂടിൽ നല്ലതുപോലെ പാകം ചെയ്ത് കഴിക്കുന്നതിലൂടെ മീനുകളിൽ ഉണ്ടായേക്കാവുന്ന ബാക്ടീരിയകളും സൂക്ഷ്മാണുക്കളും പൂർണമായും നശിച്ചുപോകും.

- പച്ചയോ പകുതി വെന്തതോ ആയ മത്സ്യം ഒഴിവാക്കുക: കടൽമത്സ്യങ്ങൾ ഉപയോഗിച്ച് നിർമ്മിക്കുന്ന പച്ചയായ വിഭവങ്ങൾ കഴിക്കുന്നത് കഴിവതും ഒഴിവാക്കണം.

വസ്തുതാവിരുദ്ധമായ വാർത്തകളും വ്യാജ പ്രചാരണങ്ങളും കണ്ട് മത്സ്യവിപണിയെയും ഉപഭോഗത്തെയും പ്രതികൂലമായി ബാധിക്കുന്ന രീതിയിലുള്ള അനാവശ്യ ഭീതി മത്സ്യപ്രേമികൾക്ക് ഉണ്ടാകേണ്ടതില്ലെന്നും പരിശോധനാഫലങ്ങൾ പൂർണമായും തൃപ്തികരമാണെന്നും ഗവേഷകർ ആവർത്തിച്ചു.

---------------

Hindusthan Samachar / Roshith K