Thiruvananthapuram, 26 സെപ്റ്റംബര് (H.S.)

തിരുവനന്തപുരം: സംസ്ഥാന സാംസ്കാരിക വകുപ്പിന് കീഴിലുള്ള വിവിധ അക്കാദമികളിലും ക്ഷേമ സ്ഥാപനങ്ങളിലും സർക്കാർ പുതിയ ഭാരവാഹികളെ നിശ്ചയിച്ചു. ദീർഘനാളായി നിലനിന്നിരുന്ന ഒഴിവുകൾ നികത്തിയും സാംസ്കാരിക മേഖലയിലെ പ്രവർത്തനങ്ങൾക്ക് പുതിയ വേഗത നൽകാനും ലക്ഷ്യമിട്ടാണ് സുപ്രധാനമായ പുനഃസംഘടന പൂർത്തിയാക്കിയത്. സിനിമാ, സാഹിത്യ, സംഗീത, നാടക രംഗങ്ങളിലെ പ്രമുഖരെയാണ് വിവിധ സ്ഥാപനങ്ങളുടെ തലപ്പത്തേക്ക് തിരഞ്ഞെടുത്തിരിക്കുന്നത്.

കേരള സംസ്ഥാന ചലച്ചിത്ര വികസന കോർപ്പറേഷന്റെ (കെ.എസ്.എഫ്.ഡി.സി) പുതിയ ചെയർമാനായി നടൻ പ്രേംകുമാർ ചുമതലയേൽക്കും. നേരത്തെ ചലച്ചിത്ര അക്കാദമി വൈസ് ചെയർമാനായിരുന്ന പ്രേംകുമാർ, പിന്നീട് ആ സ്ഥാനത്തുനിന്ന് ഒഴിവാക്കപ്പെടുകയും കോൺഗ്രസ് വേദികളിൽ സജീവ സാന്നിധ്യമായി മാറുകയും ചെയ്തിരുന്നു. സംവിധായകൻ ആലപ്പി അഷ്റഫാണ് കെ.എസ്.എഫ്.ഡി.സിയുടെ പുതിയ വൈസ് ചെയർമാൻ. കേരള സംസ്ഥാന ചലച്ചിത്ര അക്കാദമിയുടെ ചെയർമാനായി നടൻ രവീന്ദ്രനെ നിയമിച്ചു. സർക്കാരിന്റെ പൂർണ്ണ പിന്തുണയോടെ സിനിമാരംഗത്ത് കൂടുതൽ ക്രിയാത്മകമായ പ്രവർത്തനങ്ങൾ മുന്നോട്ട് കൊണ്ടുപോകാൻ സാധിക്കുമെന്ന് ചുമതലയേറ്റ ശേഷം അദ്ദേഹം പ്രതികരിച്ചു. അതേസമയം, ചലച്ചിത്ര അക്കാദമി നേതൃത്വത്തിലേക്ക് തന്റെ പേര് ഉയർന്നുകേൾക്കുകയും പിന്നീട് ഒഴിവാക്കപ്പെടുകയും ചെയ്തതിനെക്കുറിച്ച്, തനിക്ക് പദവി ലഭിക്കാത്തതിൽ യാതൊരു വിഷമവുമില്ലെന്ന് വ്യക്തമാക്കി നടൻ ജോയ് മാത്യുവും രംഗത്തെത്തി.

കേരള സാഹിത്യ അക്കാദമിയുടെ പുതിയ ചെയർമാനായി പ്രമുഖ ചിന്തകനും എഴുത്തുകാരനുമായ കല്പറ്റ നാരായണനെ തിരഞ്ഞെടുത്തു. സാഹിത്യത്തിന്റെ തനിമയും ഗൗരവവും കാത്തുസൂക്ഷിച്ചുകൊണ്ട് സ്ഥാപനത്തിന്റെ പ്രവർത്തനം മുന്നോട്ട് കൊണ്ടുപോകുമെന്ന് അദ്ദേഹം വ്യക്തമാക്കി. എഴുത്തുകാരനും മാധ്യമപ്രവർത്തകനുമായ എം.പി. സുരേന്ദ്രനാണ് സാഹിത്യ അക്കാദമിയുടെ പുതിയ സെക്രട്ടറി. കേരള സംഗീത നാടക അക്കാദമിയുടെ സാരഥ്യം പ്രശസ്ത പിന്നണി ഗായകൻ ജി. വേണുഗോപാലിനാണ് ലഭിച്ചത്. കലാരംഗത്തുള്ള എല്ലാവരെയും ഒന്നിപ്പിച്ച് മുന്നോട്ട് പോകാനാണ് ആഗ്രഹമെന്ന് അദ്ദേഹം വ്യക്തമാക്കി. നാടകരംഗത്തു നിന്നുള്ള ഹേമന്ത് കുമാറാണ് ഇവിടുത്തെ വൈസ് ചെയർമാൻ.

കേരള ലളിതകലാ അക്കാദമി ചെയർമാനായി പ്രൊഡക്ഷൻ ഡിസൈനർ പ്രൊഫ. പ്രകാശ് മൂർത്തിയെയും, വൈസ് ചെയർമാനായി ടി.ആർ. ഉദയകുമാറിനെയും തിരഞ്ഞെടുത്തു. കേരള ഫോക്ലോർ അക്കാദമിയുടെ പുതിയ ചെയർമാൻ സുരേഷ് ബാബു എളയാവൂരും വൈസ് ചെയർമാൻ ശ്രീരാമൻ കൊയ്യോനുമാണ്. സാംസ്കാരിക പ്രവർത്തക ക്ഷേമനിധി ബോർഡ് ചെയർമാനായി നിർമ്മാതാവ് എം. രഞ്ജിത്ത് നിയമിതനായി. സംസ്ഥാനത്തെ അവശരായ കലാകാരന്മാരെ ചേർത്തുപിടിക്കാനും അവർക്കുള്ള ക്ഷേമപദ്ധതികൾ വേഗത്തിലാക്കാനും സാധിക്കുന്ന സുപ്രധാന പദവിയിലെത്താൻ കഴിഞ്ഞതിൽ സന്തോഷമുണ്ടെന്ന് അദ്ദേഹം അറിയിച്ചു.

---------------

Hindusthan Samachar / Roshith K