Newdelhi, 27 സെപ്റ്റംബര് (H.S.)

ന്യൂഡൽഹി: ഇന്ത്യൻ വ്യോമസേനയുടെ (ഐഎഎഫ്) 60 ഇടത്തരം യാത്രാ-ചരക്കുനീക്ക വിമാനങ്ങൾ (എംടിഎ) വാങ്ങുന്നതിനുള്ള വൻ കരാറിൽ മഹീന്ദ്ര ഗ്രൂപ്പുമായി സഹകരിച്ച് മുന്നോട്ടുപോകുമെന്ന് ബ്രസീലിയൻ വ്യോമയാന നിർമാണ ഭീമനായ എംബ്രയർ വ്യക്തമാക്കി. തങ്ങളുടെ അത്യാധുനിക മൾട്ടി-റോൾ ടാക്റ്റിക്കൽ ട്രാൻസ്പോർട്ട് ജെറ്റായ 'കെസി-390 മില്ലേനിയം' വിമാനങ്ങളാണ് ഈ പദ്ധതിക്കായി കമ്പനി ഇന്ത്യക്ക് മുന്നിൽ വാഗ്ദാനം ചെയ്യുന്നത്. അതേസമയം, രാജ്യത്തെ സിവിലിയൻ വാണിജ്യ വിമാന വിപണിക്കായി അദാനി ഗ്രൂപ്പുമായി സഹകരിച്ചാണ് പ്രവർത്തിക്കുന്നതെന്നും എംബ്രയർ ഡിഫൻസ് ആൻഡ് സെക്യൂരിറ്റി പ്രസിഡന്റും സിഇഒയുമായ ബോസ്കോ ഡാ കോസ്റ്റ ജൂനിയർ വാർത്താ ഏജൻസിയായ എഎൻഐക്ക് നൽകിയ പ്രത്യേക അഭിമുഖത്തിൽ അറിയിച്ചു.

പ്രതിരോധ മന്ത്രാലയം പുറപ്പെടുവിച്ച പ്രൊപ്പോസൽ രേഖകൾ (ആർഎഫ്പി) അദാനി ഗ്രൂപ്പിനും ലഭിച്ച പശ്ചാത്തലത്തിൽ, സൈനിക വിമാന കരാറിലും മാറ്റമുണ്ടാകുമോ എന്ന ചോദ്യത്തിന് കൃത്യമായ മറുപടിയാണ് എംബ്രയർ മേധാവി നൽകിയത്. പ്രതിരോധ മേഖലയിലെ തങ്ങളുടെ സഖ്യം മഹീന്ദ്രയുമായി തന്നെയായിരിക്കുമെന്നും അതിൽ മാറ്റമില്ലെന്നും അദ്ദേഹം വ്യക്തമാക്കി. 2023-ൽ തന്നെ ഇന്ത്യയിൽ വിമാനത്തിന്റെ ഡെമോൺസ്ട്രേഷൻ വിജയകരമായി നടത്തിയിരുന്നു. അന്ന് വിപണി വിശദമായി വിലയിരുത്തിയ ശേഷമാണ് സൈനിക വിമാന പദ്ധതിക്കായി മഹീന്ദ്ര ഗ്രൂപ്പിനെ പങ്കാളിയായി തിരഞ്ഞെടുത്തത്. രാജ്യത്തെ പ്രാദേശിക വിമാന സർവീസുകളുടെയും സിവിലിയൻ കണക്റ്റിവിറ്റിയുടെയും ആവശ്യങ്ങൾ നിറവേറ്റുന്നതിന് മാത്രമാണ് അദാനിയുമായി കൈകോർക്കുന്നതെന്നും അദ്ദേഹം കൂട്ടിച്ചേർത്തു.

പഴക്കം ചെന്ന എഎൻ-32 ഉൾപ്പെടെയുള്ള സൈനിക വിമാനങ്ങൾക്ക് പകരമായി 60 പുതിയ വിമാനങ്ങൾ വാങ്ങാനാണ് വ്യോമസേന ലക്ഷ്യമിടുന്നത്. ഈ പദ്ധതിയിൽ മറ്റൊരു 50 ശതമാനം വിമാനങ്ങൾ കൂടി അധികമായി വാങ്ങാനുള്ള വ്യവസ്ഥയുമുണ്ട്. മഹീന്ദ്രയെ കൂടാതെ ടാറ്റ, ഹിന്ദുസ്ഥാൻ എയറോനോട്ടിക്സ് ലിമിറ്റഡ് (എച്ച്എഎൽ), റിലയൻസ് ഡിഫൻസ്, അദാനി എന്നീ പ്രമുഖ കമ്പനികൾക്കാണ് കേന്ദ്ര പ്രതിരോധ മന്ത്രാലയത്തിൽനിന്ന് ആർഎഫ്പി ലഭിച്ചിട്ടുള്ളത്. ടാറ്റയും അമേരിക്കൻ കമ്പനിയായ ലോക്ക്ഹീഡ് മാർട്ടിനും സംയുക്തമായി രംഗത്തിറക്കുന്ന സി-130 ജെ സൂപ്പർ ഹെർക്കുലീസ് വിമാനങ്ങളാണ് കെസി-390 ന് പ്രധാന വെല്ലുവിളി ഉയർത്തുന്നത്.

എന്നാൽ അമേരിക്കൻ വിമാനങ്ങളേക്കാൾ കൂടുതൽ വേഗത്തിലും ഭാരവാഹക ശേഷിയിലും കെസി-390 വിമാനങ്ങൾക്ക് പറക്കാൻ കഴിയുമെന്ന് എംബ്രയർ സിഇഒ അവകാശപ്പെട്ടു. നിലവിൽ ഈ വിമാനങ്ങൾക്ക് ആഗോളതലത്തിൽ 93 ശതമാനം പ്രവർത്തനക്ഷമതയും 99 ശതമാനം മിഷൻ പൂർത്തീകരണ വിജയവുമുണ്ട്. യുഎഇ വ്യോമസേനയുമായി ചേർന്ന് മരുഭൂമിയിലെ അൺപേവ്ഡ് റൺവേകളിൽ നടത്തിയ ഒരാഴ്ച നീണ്ട പരീക്ഷണപ്പറക്കലുകൾ മികച്ച രീതിയിൽ പൂർത്തിയാക്കാൻ സാധിച്ചിരുന്നു. നിലവിൽ ലോകത്താകമാനം 70-ഓളം കെസി-390 ഓർഡറുകൾ കമ്പനിക്കുണ്ട്. തങ്ങളുടെ ആഗോള വിതരണ ശൃംഖലയുടെയും വിമാന അറ്റകുറ്റപ്പണി (എംആർഒ) സംവിധാനങ്ങളുടെയും പ്രധാന ഹബ്ബായി ഇന്ത്യയെ മാറ്റാൻ എംബ്രയർ പദ്ധതിയിടുന്നുണ്ടെന്നും ബോസ്കോ ഡാ കോസ്റ്റ കൂട്ടിച്ചേർത്തു.

---------------

Hindusthan Samachar / Roshith K