Kerala, 27 സെപ്റ്റംബര് (H.S.)

ന്യൂഡൽഹി: തെരഞ്ഞെടുപ്പ് കമ്മീഷനെതിരെ അടിസ്ഥാനരഹിതമായ ആരോപണങ്ങൾ ഉന്നയിച്ച് ജനങ്ങൾക്കിടയിൽ ആശയക്കുഴപ്പം സൃഷ്ടിക്കാൻ ശ്രമിച്ച കോൺഗ്രസ് നേതാവ് രാഹുൽ ഗാന്ധി രാജ്യത്തെ ജനങ്ങളോട് മാപ്പ് പറയണമെന്ന് അസം മുഖ്യമന്ത്രി ഹിമന്ത ബിശ്വ ശർമ്മ ആവശ്യപ്പെട്ടു. വരാനിരിക്കുന്ന പ്രതിപക്ഷ 'ഇൻഡി' (I.N.D.I.A) സഖ്യത്തിന്റെ യോഗത്തെ രൂക്ഷമായി പരിഹസിച്ച അദ്ദേഹം, ഇതൊരു സംഘം പരാജയപ്പെട്ടവരുടെയും നിരാശരുടെയും കൂട്ടായ്മ മാത്രമാണെന്നും രാജ്യത്തെ ജനാധിപത്യത്തെ ദുർബലപ്പെടുത്തുകയാണ് അവരുടെ ലക്ഷ്യമെന്നും കുറ്റപ്പെടുത്തി.

തെരഞ്ഞെടുപ്പുകളിൽ തുടർച്ചയായി തിരിച്ചടി നേരിടുമ്പോഴെല്ലാം ഭരണഘടനാ സ്ഥാപനങ്ങളെ വേട്ടയാടുന്ന സമീപനമാണ് കോൺഗ്രസും രാഹുൽ ഗാന്ധിയും സ്വീകരിക്കുന്നതെന്ന് ഹിമന്ത ബിശ്വ ശർമ്മ ആരോപിച്ചു. ജനങ്ങൾ എന്തുകൊണ്ട് പാർട്ടിയെ വീണ്ടും വീണ്ടും തള്ളിക്കളയുന്നു എന്നതിനെക്കുറിച്ച് രാഹുൽ ഗാന്ധി ആത്മപരിശോധന നടത്താൻ തയ്യാറാവണം. പരാജയം നേരിട്ട സംസ്ഥാനങ്ങളിൽ സന്ദർശനം നടത്താനോ പരാജയകാരണങ്ങൾ വിലയിരുത്താനോ ഇവർ തുനിയുന്നില്ല. മറിച്ച്, തോൽവി നേരിടുമ്പോഴെല്ലാം വോട്ടിംഗ് യന്ത്രങ്ങളെയും ഭരണഘടനാ സ്ഥാപനങ്ങളെയും പഴിചാരി സ്വയം ന്യായീകരിക്കാനാണ് ശ്രമിക്കുന്നതെന്നും അദ്ദേഹം തുറന്നടിച്ചു. 2014-ൽ മൻമോഹൻ സിംഗ് സർക്കാർ നിയമിച്ച തെരഞ്ഞെടുപ്പ് കമ്മീഷൻ നിലനിൽക്കുമ്പോഴും കോൺഗ്രസ് ദയനീയമായി തോറ്റ ചരിത്രം ഓർക്കണമെന്നും അദ്ദേഹം കൂട്ടിച്ചേർത്തു.

മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ ഏകപക്ഷീയമായാണ് തീരുമാനങ്ങൾ എടുക്കുന്നതെന്നായിരുന്നു രാഹുൽ ഗാന്ധിയുടെയും പ്രതിപക്ഷ പാർട്ടികളുടെയും പ്രധാന ആക്ഷേപം. എന്നാൽ, പ്രത്യേക തീവ്ര വോട്ടർ പട്ടിക പുതുക്കൽ പ്രക്രിയയുമായി (SIR) ബന്ധപ്പെട്ട എല്ലാ തീരുമാനങ്ങളും കമ്മീഷൻ ഏകകണ്ഠമായാണ് കൈക്കൊണ്ടതെന്ന് മുഴുവൻ കമ്മീഷണർമാരും വ്യക്തമാക്കിയിട്ടുണ്ട്. യാഥാർത്ഥ്യം പുറത്തുവന്ന സാഹചര്യത്തിൽ, തെരഞ്ഞെടുപ്പ് കമ്മീഷനെതിരെ തെറ്റായ പ്രചാരണം നടത്തിയ രാഹുൽ ഗാന്ധിയും കോൺഗ്രസും ജനങ്ങളോട് പരസ്യമായി മാപ്പ് പറയുകയാണ് വേണ്ടതെന്ന് അസം മുഖ്യമന്ത്രി വ്യക്തമാക്കി.

വോട്ടർ പട്ടിക പരിഷ്കരണവുമായി ബന്ധപ്പെട്ട് കമ്മീഷണർമാരായ സുഖ്ബീർ സിംഗ് സന്ധുവും വിവേക് ജോഷിയും വിയോജിപ്പുകൾ പ്രകടിപ്പിച്ചുവെന്ന റിപ്പോർട്ടുകൾ പുറത്തുവന്നതിന് പിന്നാലെയാണ് വിവാദം ചൂടുപിടിച്ചത്. തുടർന്ന് കോൺഗ്രസ്, സിപിഐ, സിപിഎം, തൃണമൂൽ കോൺഗ്രസ്, ശിവസേന (യുബിടി) തുടങ്ങിയ പ്രതിപക്ഷ കക്ഷികൾ മുഖ്യ തെരഞ്ഞെടുപ്പ് കമ്മീഷണറുടെ രാജി ആവശ്യപ്പെടുകയും രാഹുൽ ഗാന്ധി കമ്മീഷനെതിരെ കടുത്ത ആരോപണങ്ങൾ ഉന്നയിക്കുകയും ചെയ്തിരുന്നു. എന്നാൽ, നടപടിക്രമങ്ങൾ സുതാര്യവും ഔദ്യോഗിക ചട്ടങ്ങൾക്ക് അനുസൃതവുമായാണ് പൂർത്തിയാക്കിയതെന്ന് വ്യക്തമാക്കി തെരഞ്ഞെടുപ്പ് കമ്മീഷൻ ആരോപണങ്ങൾ പൂർണ്ണമായി തള്ളിക്കളഞ്ഞു. ഈ സാഹചര്യത്തിൽ പ്രതിപക്ഷ സഖ്യത്തിന്റെ യോഗങ്ങൾ ജനങ്ങളിൽ യാതൊരു ചലനവും സൃഷ്ടിക്കില്ലെന്നും ഹിമന്ത ബിശ്വ ശർമ്മ കൂട്ടിച്ചേർത്തു.

---------------

Hindusthan Samachar / Roshith K