Fagwara, 28 സെപ്റ്റംബര് (H.S.)

ഫഗ്വാര (പഞ്ചാബ്): ക്യാമ്പസിനുള്ളിൽ പെൺകുട്ടി പീഡനത്തിനിരയായെന്ന പരാതിയെ തുടർന്ന് വിദ്യാർത്ഥി സമരം അക്രമാസക്തമായതോടെ, പഞ്ചാബിലെ പ്രമുഖ സ്വകാര്യ സർവകലാശാലയായ ലൗവ്ലി പ്രൊഫഷണൽ യൂണിവേഴ്സിറ്റിയിൽ ക്ലാസുകൾ പത്ത് ദിവസത്തേക്ക് നിർത്തിവെച്ചു. നടക്കാനിരുന്ന മിഡ്-ടേം പരീക്ഷകളും അനിശ്ചിതകാലത്തേക്ക് മാറ്റിവെച്ചിട്ടുണ്ട്. വിദ്യാർത്ഥികളുടെ സുരക്ഷ മുൻനിർത്തിയാണ് സെപ്റ്റംബർ 28 മുതൽ പ്രാബല്യത്തിൽ വരുന്ന രീതിയിൽ നടപടിയെന്ന് സർവകലാശാല അധികൃതർ അറിയിച്ചു.

ഹോസ്റ്റൽ മുറിയിൽ പുറത്തുനിന്നെത്തിയ ഒരാൾ അതിക്രമിച്ചു കയറി വിദ്യാർത്ഥിനിയെ പീഡിപ്പിച്ചുവെന്ന വിവരം പുറത്തുവന്നതോടെയാണ് ക്യാമ്പസിൽ സംഘർഷാവസ്ഥ ഉടലെടുത്തത്. മാനേജ്മെന്റ് സംഭവം ഒതുക്കിത്തീർക്കാൻ ശ്രമിക്കുന്നുവെന്ന് ആരോപിച്ച് ആയിരക്കണക്കിന് വിദ്യാർത്ഥികൾ പ്രതിഷേധവുമായി തെരുവിലിറങ്ങി. ഞായറാഴ്ചയോടെ സമരം കൂടുതൽ അക്രമാസക്തമായി. വിദ്യാർത്ഥികൾ ജലന്ധർ-ഫഗ്വാര ദേശീയപാത ഉപരോധിക്കുകയും ക്യാമ്പസിലെ കെട്ടിടങ്ങൾക്കും വാഹനങ്ങൾക്കും കേടുപാടുകൾ വരുത്തുകയും ചെയ്തു.

പോലീസുമായി ഏറ്റുമുട്ടൽ; ലാത്തിച്ചാർജ്

പ്രതിഷേധം നിയന്ത്രിക്കാനെത്തിയ പോലീസിന് നേരെ കല്ലേറുണ്ടായതോടെ സ്ഥിതിഗതികൾ കൂടുതൽ വഷളായി. തുടർന്ന് വിദ്യാർത്ഥികളെ പിരിച്ചുവിടാൻ പോലീസ് ലാത്തിച്ചാർജ് പ്രയോഗിച്ചു. സംഘർഷത്തിൽ നിരവധി പോലീസുകാർക്കും വിദ്യാർത്ഥികൾക്കും പരിക്കേറ്റതായാണ് റിപ്പോർട്ട്. ക്രമസമാധാന നില പൂർണ്ണമായും തകർന്നതിനെ തുടർന്ന് ഉന്നത പോലീസ് ഉദ്യോഗസ്ഥരുടെ നേതൃത്വത്തിൽ വൻ പോലീസ് സന്നാഹം ക്യാമ്പസിലും പരിസരങ്ങളിലും നിലയുറപ്പിച്ചിരിക്കുകയാണ്.

പരീക്ഷകൾ മാറ്റി; വിദ്യാർത്ഥികളോട് വീടുകളിലേക്ക് മടങ്ങാൻ നിർദേശം

സാഹചര്യം നിയന്ത്രണാതീതമായതോടെയാണ് പരീക്ഷകൾ മാറ്റിവെക്കാനും ക്ലാസുകൾ താൽക്കാലികമായി റദ്ദാക്കാനും അധികൃതർ തീരുമാനിച്ചത്. പുതുക്കിയ പരീക്ഷാ തീയതികൾ പിന്നീട് അറിയിക്കും. താല്പര്യമുള്ള വിദ്യാർത്ഥികൾക്ക് രക്ഷിതാക്കളുടെ അനുമതിയോടെ ഈ പത്തുദിവസത്തെ അവധിയിൽ സ്വന്തം വീടുകളിലേക്ക് മടങ്ങാമെന്ന് സർവകലാശാല സർക്കുലറിൽ വ്യക്തമാക്കിയിട്ടുണ്ട്. ക്യാമ്പസിൽ തുടരുന്ന വിദ്യാർത്ഥികൾ സംഘർഷങ്ങളിൽ ഏർപ്പെടരുതെന്നും ഹോസ്റ്റലുകളിൽ തന്നെ തുടരണമെന്നും മുന്നറിയിപ്പ് നൽകിയിട്ടുണ്ട്.

പ്രത്യേക അന്വേഷണ സംഘം രൂപീകരിച്ചു

അതേസമയം, പീഡന ആരോപണം അടിസ്ഥാനരഹിതമായ അഭ്യൂഹമാണെന്നും സർവകലാശാലയുടെ സൽപ്പേരിന് കളങ്കം വരുത്താനുള്ള ശ്രമമാണിതെന്നും അധികൃതർ പ്രതികരിച്ചു. എന്നാൽ വിദ്യാർത്ഥികളുടെ ശക്തമായ പ്രതിഷേധത്തെ തുടർന്ന് പോലീസ് അജ്ഞാത വ്യക്തിക്കെതിരെ ബലാത്സംഗക്കുറ്റത്തിന് എഫ്ഐആർ രജിസ്റ്റർ ചെയ്തു. സംഭവത്തിൽ സമഗ്രമായ അന്വേഷണം നടത്തുന്നതിനായി പ്രത്യേക അന്വേഷണ സംഘത്തെയും നിയോഗിച്ചിട്ടുണ്ട്. സിസിടിവി ദൃശ്യങ്ങളും ഫോൺ രേഖകളും ഉൾപ്പെടെയുള്ള ഫോറൻസിക് തെളിവുകൾ ശേഖരിച്ചുവരികയാണെന്ന് പോലീസ് ഉദ്യോഗസ്ഥർ വ്യക്തമാക്കി. വൻ പോലീസ് സന്നാഹത്തെ വിന്യസിച്ചതോടെ ക്യാമ്പസിലെ സാഹചര്യം നിലവിൽ നിയന്ത്രണവിധേയമാണെന്നാണ് ലഭിക്കുന്ന വിവരം.

---------------

Hindusthan Samachar / Roshith K