Lucknow , 28 സെപ്റ്റംബര് (H.S.)

ലഖ്നൗ: ഉത്തർപ്രദേശിൽ തുടർച്ചയായി പെയ്യുന്ന കനത്ത മഴയെത്തുടർന്നുണ്ടായ വിവിധ അപകടങ്ങളിൽ മരിച്ചവരുടെ എണ്ണം 56 ആയി ഉയർന്നു. വെള്ളിയാഴ്ച മുതൽ സംസ്ഥാനത്തിന്റെ വിവിധ ഭാഗങ്ങളിൽ നിർത്താതെ പെയ്യുന്ന പേമാരി വൻ നാശനഷ്ടമാണ് വിതച്ചിരിക്കുന്നത്. ദുരിതാശ്വാസ കമ്മീഷണറുടെ ഓഫീസിൽ നിന്നുള്ള കണക്കുകൾ പ്രകാരം മഴക്കെടുതികളിൽപ്പെട്ട് ഇതുവരെ 46 പേർക്ക് പരിക്കേറ്റതായും റിപ്പോർട്ടുണ്ട്. സംസ്ഥാനത്തെ 63 ജില്ലകളിലും കനത്ത മഴ രേഖപ്പെടുത്തിയതോടെ ജനജീവിതം പൂർണ്ണമായും സ്തംഭിച്ച അവസ്ഥയിലാണ്.

സീതാപൂർ ജില്ലയിലാണ് ഏറ്റവും കൂടുതൽ മരണം റിപ്പോർട്ട് ചെയ്തത്; ഇവിടെ ഏഴുപേർക്ക് ജീവൻ നഷ്ടമായി. ലഖിംപൂർ ഖേരി, ബഹ്റൈച്ച്, ബൽറാംപൂർ ജില്ലകളിൽ അഞ്ചുപേർ വീതവും അയോധ്യ, ഗൊരഖ്പുർ എന്നിവിടങ്ങളിൽ നാലുപേർ വീതവും മരിച്ചു. സംസ്ഥാനത്തുടനീളം ആയിരത്തിലധികം വീടുകൾ പൂർണ്ണമായോ ഭാഗികമായോ തകർന്നിട്ടുണ്ട്. സാധാരണ ലഭിക്കേണ്ട 1.8 മില്ലിമീറ്റർ മഴയ്ക്ക് പകരം കഴിഞ്ഞ 24 മണിക്കൂറിനുള്ളിൽ 45.1 മില്ലിമീറ്റർ മഴയാണ് സംസ്ഥാനത്ത് രേഖപ്പെടുത്തിയത്.

ഇരുപതിലധികം ജില്ലകളിൽ ഇപ്പോഴും അതിശക്തമായ മഴ മുന്നറിയിപ്പ് നിലനിൽക്കുന്നുണ്ട്. കേന്ദ്ര ജല കമ്മീഷന്റെ റിപ്പോർട്ട് പ്രകാരം ഘാഗ്ര, രപ്തി തുടങ്ങിയ പ്രധാന നദികളിലെ ജലനിരപ്പ് അപകടകരമായ രീതിയിൽ ഉയരുകയാണ്. ഇത് താഴ്ന്ന പ്രദേശങ്ങളിൽ കനത്ത പ്രളയഭീഷണി സൃഷ്ടിക്കുന്നുണ്ട്. നേപ്പാൾ അതിർത്തിയോട് ചേർന്നുള്ള ജില്ലകളിൽ അധികൃതർ പ്രത്യേക നിരീക്ഷണം ഏർപ്പെടുത്തിയിട്ടുണ്ട്.

തലസ്ഥാനമായ ലഖ്നൗവിലെ പഴയ നഗരഭാഗമായ ഹുസൈനാബാദിൽ കനത്ത മഴയെത്തുടർന്ന് ചരിത്രപ്രസിദ്ധമായ കവാടത്തിന്റെ ഒരു ഭാഗം തകർന്നു വീണു. സാധാരണയായി വലിയ തിരക്ക് അനുഭവപ്പെടുന്ന മേഖലയാണെങ്കിലും, സംഭവസമയത്ത് ആളുകൾ കുറവായതിനാൽ വൻ ദുരന്തം ഒഴിവായി. നഗരത്തിന്റെ പല ഭാഗങ്ങളിലും വൻമരങ്ങൾ കടപുഴകി വീണ് വാഹനങ്ങൾ തകരുകയും ഗതാഗതം തടസ്സപ്പെടുകയും ചെയ്തു. കാൺപൂർ, ഗൊരഖ്പുർ തുടങ്ങിയ നഗരങ്ങളിലെ റോഡുകളിലും മാർക്കറ്റുകളിലും വെള്ളം കയറി. ഗൊരഖ്പുരിൽ ഓടകൾ കരകവിഞ്ഞൊഴുകിയതോടെ നിരവധി വീടുകളിലും കടകളിലും വെള്ളം കയറി കനത്ത നാശനഷ്ടമുണ്ടായി.

സ്ഥിതിഗതികൾ ഗുരുതരമായ പശ്ചാത്തലത്തിൽ മുഖ്യമന്ത്രി യോഗി ആദിത്യനാഥ് അടിയന്തര യോഗം വിളിച്ച് രക്ഷാപ്രവർത്തനം ഊർജ്ജിതമാക്കാൻ നിർദ്ദേശം നൽകി. ദുരന്തനിവാരണ സേനകൾ അതീവ ജാഗ്രത പാലിക്കണമെന്നും ജില്ലാ മജിസ്ട്രേറ്റുമാരും ഉന്നത ഉദ്യോഗസ്ഥരും നേരിട്ട് ദുരിതബാധിത പ്രദേശങ്ങൾ സന്ദർശിച്ച് ആവശ്യമായ സഹായങ്ങൾ ഉറപ്പാക്കണമെന്നും അദ്ദേഹം ആവശ്യപ്പെട്ടു. അടുത്ത 24 മണിക്കൂറിന് ശേഷം കാലാവസ്ഥയിൽ നേരിയ പുരോഗതി ഉണ്ടായേക്കുമെന്നാണ് കാലാവസ്ഥാ നിരീക്ഷണ കേന്ദ്രം വ്യക്തമാക്കുന്നത്. ദുരിതബാധിതർക്കായി വിവിധയിടങ്ങളിൽ ക്യാമ്പുകൾ തുറന്നിട്ടുണ്ട്.

---------------

Hindusthan Samachar / Roshith K