Kerala, 30 സെപ്റ്റംബര് (H.S.)

മംഗളൂരു: കർണാടകയിലെ മംഗളൂരുവിൽ പ്രവർത്തിക്കുന്ന മംഗലാപുരം റിഫൈനറി ആൻഡ് പെട്രോകെമിക്കൽസ് ലിമിറ്റഡ് (MRPL) പ്ലാന്റിൽ വൻ സ്ഫോടനവും തുടർന്ന് തീപിടുത്തവും ഉണ്ടായി. അപകടത്തിൽ എട്ട് ജീവനക്കാർക്ക് പരിക്കേറ്റതായാണ് പ്രാഥമിക വിവരം. പരിക്കേറ്റവരിൽ ചിലരുടെ നില ഗുരുതരമാണെന്നാണ് സൂചന. ഇവരെ ഉടൻതന്നെ സമീപത്തെ സ്വകാര്യ ആശുപത്രിയിൽ പ്രവേശിപ്പിച്ചു.

റിഫൈനറിയുടെ ഒരു പ്രൊസസിങ് യൂണിറ്റിനുള്ളിൽ സാങ്കേതിക തകരാറുകളെ തുടർന്നാണ് ഉഗ്രസ്ഫോടനം ഉണ്ടായതെന്നാണ് റിപ്പോർട്ടുകൾ വ്യക്തമാക്കുന്നത്. സ്ഫോടനത്തിന് പിന്നാലെ പ്ലാന്റിൽ കനത്ത പുക ഉയരുകയും തീ ആളിപ്പടരുകയും ചെയ്തു. സ്ഫോടനത്തിന്റെ പ്രകമ്പനം കിലോമീറ്ററുകളോളം അകലെ വരെ അനുഭവപ്പെട്ടതായി പ്രദേശവാസികൾ പറയുന്നു. തുടർന്ന് റിഫൈനറിയുടെ ഇൻ-ഹൗസ് ഫയർഫോഴ്സ് യൂണിറ്റുകളും നഗരത്തിൽ നിന്നുള്ള അഗ്നിശമന സേനാ യൂണിറ്റുകളും ഉടൻ തന്നെ സ്ഥലത്തെത്തി രക്ഷാപ്രവർത്തനം ആരംഭിച്ചു. മണിക്കൂറുകൾ നീണ്ട കഠിന പരിശ്രമത്തിനൊടുവിലാണ് തീ നിയന്ത്രണവിധേയമാക്കാൻ സാധിച്ചത്.

സംഭവമറിഞ്ഞയുടൻ ജില്ലാ ഭരണകൂടത്തിലെയും പോലീസ് വകുപ്പിലെയും ഉന്നത ഉദ്യോഗസ്ഥർ സംഭവസ്ഥലത്തേക്ക് കുതിച്ചെത്തി. ജില്ലാ കളക്ടറും മംഗളൂരു സിറ്റി പോലീസ് കമ്മീഷണറും പ്ലാന്റ് സന്ദർശിച്ച് രക്ഷാപ്രവർത്തനങ്ങൾ ഏകോപിപ്പിച്ചു. അപകടസ്ഥലം സുരക്ഷിതമാക്കാനും മറ്റ് പ്ലാന്റുകളിലേക്ക് തീ പടരാതിരിക്കാനും ആവശ്യമായ അടിയന്തര മുൻകരുതലുകൾ അധികൃതർ സ്വീകരിച്ചിട്ടുണ്ട്.

സ്ഫോടനത്തിന് കാരണമായ സാങ്കേതിക തകരാറുകൾ എന്തൊക്കെയാണെന്ന് കണ്ടെത്താൻ കമ്പനി തലത്തിലും വിദഗ്ദ്ധ സമിതിയെ നിയോഗിച്ചിട്ടുണ്ട്. ഗ്യാസ് ചോർച്ചയോ പ്രഷർ വ്യതിയാനങ്ങളോ ആണോ സ്ഫോടനത്തിലേക്ക് നയിച്ചതെന്ന കാര്യത്തിൽ വിശദമായ സാങ്കേതിക പരിശോധനകൾ നടക്കുകയാണ്.

റിഫൈനറിയിൽ സുരക്ഷാ മാനദണ്ഡങ്ങൾ കൃത്യമായി പാലിച്ചിരുന്നോ എന്ന് കർണാടക വ്യവസായ സുരക്ഷാ വകുപ്പും അന്വേഷിക്കും. തൊഴിലാളികളുടെ ആരോഗ്യനില നിരന്തരം നിരീക്ഷിച്ചു വരികയാണെന്നും പരിക്കേറ്റവർക്ക് ഏറ്റവും മികച്ച ചികിത്സ ലഭ്യമാക്കുമെന്നും പ്ലാന്റ് അധികൃതരും ജില്ലാ ഭരണകൂടവും അറിയിച്ചു. നിലവിൽ സ്ഥിതിഗതികൾ ശാന്തമാണെന്നും മറ്റ് യൂണിറ്റുകളുടെ പ്രവർത്തനം ഘട്ടംഘട്ടമായി സുരക്ഷിതമാക്കി വരികയാണെന്നും അധികൃതർ വ്യക്തമാക്കി.

---------------

Hindusthan Samachar / Roshith K