Kottayam, 30 സെപ്റ്റംബര് (H.S.)

കോട്ടയം: വാഹനാപകടത്തിൽ അന്തരിച്ച പ്രശസ്ത ഹാസ്യനടനും ടെലിവിഷൻ താരവുമായ കൊല്ലം സുധിയുടെ കുടുംബത്തിന് ഒരു കോടി എഴുപത്തിയേഴ് ലക്ഷം രൂപ (1.77 കോടി രൂപ) ഇൻഷുറൻസ് നഷ്ടപരിഹാരം നൽകാൻ കോടതി ഉത്തരവ്. കോട്ടയം മോട്ടോർ ആക്സിഡന്റ് ക്ലെയിംസ് ട്രൈബ്യൂണലിന്റേതാണ് (MACT) സുപ്രധാനമായ ഈ വിധി. കൊല്ലം സുധിയുടെ അകാല വിയോഗത്തെ തുടർന്ന് നിരാലംബരായ ആശ്രിതർക്ക് ആശ്വാസമേകുന്നതാണ് ട്രൈബ്യൂണലിന്റെ ഈ തീരുമാനം.

നഷ്ടപരിഹാരത്തുകയായി 1,41,09,840 രൂപയാണ് കോടതി ആദ്യം കണക്കാക്കി വിധിച്ചത്. എന്നാൽ, ഹർജി ഫയൽ ചെയ്ത തീയതി മുതൽ തുക പൂർണ്ണമായി കെട്ടിവെയ്ക്കുന്നത് വരെയുള്ള കാലയളവിലെ 8.5 ശതമാനം പലിശയും ഇതിനൊപ്പം കോടതി അനുവദിക്കുകയായിരുന്നു. പലിശയും കോടതി ചെലവുകളും കൂടി കണക്കാക്കുമ്പോഴാണ് ആശ്രിതർക്ക് ലഭിക്കുന്ന മൊത്തം തുക ഏകദേശം 1.77 കോടി രൂപയായി ഉയർന്നത്. സുധിയുടെ ഭാര്യയും മക്കളുമടങ്ങുന്ന കുടുംബത്തിനാണ് ഈ ആനുകൂല്യം ലഭിക്കുക. ഇൻഷുറൻസ് കമ്പനി ഈ തുക ട്രൈബ്യൂണലിൽ കെട്ടിവെക്കണമെന്നാണ് വിധിയിലെ നിർദ്ദേശം.

2023 ജൂൺ മാസത്തിലാണ് കേരളക്കരയെ നടുക്കിയ ആ ദുരന്തം സംഭവിച്ചത്. വടകരയിൽ ഒരു സ്റ്റേജ് ഷോ കഴിഞ്ഞ് എറണാകുളത്തേക്ക് മടങ്ങുകയായിരുന്ന സുധിയും സംഘവും സഞ്ചരിച്ച കാർ തൃശ്ശൂർ കയ്പമംഗലം പനമ്പിക്കുന്നിൽ വെച്ച് എതിരെ വന്ന പിക്കപ്പ് വാനുമായി കൂട്ടിയിടിക്കുകയായിരുന്നു. അപകടത്തിൽ ഗുരുതരമായി പരുക്കേറ്റ കൊല്ലം സുധിയെ ഉടൻ തന്നെ കൊടുങ്ങല്ലൂരിലെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. അദ്ദേഹത്തോടൊപ്പം കാറിലുണ്ടായിരുന്ന മറ്റ് പ്രമുഖ കലാകാരന്മാർക്കും അപകടത്തിൽ പരുക്കേറ്റിരുന്നു.

ടെലിവിഷൻ കോമഡി പരിപാടികളിലൂടെയും നിരവധി മലയാള സിനിമകളിലൂടെയും മലയാളികളുടെ പ്രിയങ്കരനായി മാറിയ താരമായിരുന്നു കൊല്ലം സുധി. അപ്രതീക്ഷിതമായി എത്തിയ വിയോഗം അദ്ദേഹത്തിന്റെ കുടുംബത്തെ വലിയ സാമ്പത്തിക പ്രതിസന്ധിയിലേക്കായിരുന്നു തള്ളിവിട്ടത്. കുടുംബത്തിന്റെ ഏക അത്താണിയായിരുന്ന സുധിയുടെ വിയോഗം സൃഷ്ടിച്ച ശൂന്യതയ്ക്ക് പകരമാവില്ലെങ്കിലും, ട്രൈബ്യൂണലിന്റെ ഈ നഷ്ടപരിഹാര വിധി ആശ്രിതരുടെ ഭാവി ജീവിതത്തിന് വലിയൊരു സാമ്പത്തിക താങ്ങായി മാറും.

---------------

Hindusthan Samachar / Roshith K