Newdelhi , 30 സെപ്റ്റംബര് (H.S.)

ന്യൂഡൽഹി: വരാനിരിക്കുന്ന റാബി വിപണന സീസണിലേക്ക് (2027-28) ഗോതമ്പിന്റെ കുറഞ്ഞ താങ്ങുവില (MSP) വർധിപ്പിച്ച് കേന്ദ്ര മന്ത്രിസഭ. ക്വിന്റലിന് 25 രൂപയുടെ വർധനവാണ് വരുത്തിയിരിക്കുന്നത്. ഇതോടെ ഗോതമ്പിന്റെ പുതിയ താങ്ങുവില ക്വിന്റലിന് 2,610 രൂപയായി ഉയർന്നു. പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ചേർന്ന കേന്ദ്ര മന്ത്രിസഭാ യോഗത്തിലാണ് കർഷകർക്ക് പ്രയോജനകരമായ സുപ്രധാന തീരുമാനമുണ്ടായത്. കേന്ദ്ര വാർത്താവിതരണ പ്രക്ഷേപണ മന്ത്രി അശ്വിനി വൈഷ്ണവാണ് മന്ത്രിസഭാ തീരുമാനങ്ങൾ മാധ്യമങ്ങളോട് വിശദീകരിച്ചത്.

2026-27 വിപണന വർഷത്തിൽ ഗോതമ്പിന്റെ താങ്ങുവില ക്വിന്റലിന് 2,585 രൂപയായിരുന്നു. ഒക്ടോബറിൽ തുടങ്ങി ഏപ്രിലിൽ വിളവെടുപ്പ് നടക്കുന്ന പ്രധാന ശൈത്യകാല വിളയായ ഗോതമ്പിന്റെ വിതയ്ക്കൽ സീസൺ ആരംഭിക്കുന്നതിന് മുന്നോടിയായാണ് കേന്ദ്ര കൃഷി മന്ത്രാലയത്തിന്റെ ശുപാർശ പ്രകാരം കേന്ദ്ര സർക്കാർ താങ്ങുവില പുതുക്കി നിശ്ചയിച്ചത്.

ഉത്പാദനച്ചെലവിനേക്കാൾ ഇരട്ടിയിലേറെ വില

ഗോതമ്പിന്റെ ഉത്പാദനച്ചെലവ് ക്വിന്റലിന് 1,264 രൂപയാണെന്ന് കേന്ദ്രമന്ത്രി അശ്വിനി വൈഷ്ണവ് വ്യക്തമാക്കി. ഉത്പാദനച്ചെലവിനേക്കാൾ ഇരട്ടിയിലധികം തുകയാണ് പുതിയ താങ്ങുവിലയായ 2,610 രൂപയിലൂടെ കർഷകർക്ക് ഉറപ്പാക്കുന്നതെന്നും അദ്ദേഹം കൂട്ടിച്ചേർത്തു. കാർഷിക ചെലവുകൾക്കും വിലകൾക്കുമുള്ള കമ്മീഷന്റെ (CACP) ശുപാർശകളെ അടിസ്ഥാനമാക്കിയാണ് നിരക്ക് നിശ്ചയിച്ചിരിക്കുന്നത്. ആഭ്യന്തര-ആഗോള വിപണിയിലെ വിലനിലവാരം, ഉത്പാദനച്ചെലവ്, കാലാവസ്ഥാ ഘടകങ്ങൾ തുടങ്ങിയവ പരിഗണിച്ചാണ് ഈ നിർദ്ദേശം സമർപ്പിച്ചത്.

മറ്റ് റാബി വിളകൾക്കും വില കൂട്ടി

ഗോതമ്പിന് പുറമെ മറ്റ് അഞ്ച് റാബി വിളകളുടെയും താങ്ങുവില വർധിപ്പിക്കാൻ മന്ത്രിസഭ അംഗീകാരം നൽകി:

-

ബാർലി: ക്വിന്റലിന് 2,150 രൂപയിൽ നിന്ന് 2,286 രൂപയായി ഉയർത്തി.

-

കടല (ഗ്രാം): 83 രൂപ വർധിപ്പിച്ച് ക്വിന്റലിന് 5,958 രൂപയാക്കി.

-

മസൂർ പരിപ്പ്: ക്വിന്റലിന് 390 രൂപ വർധിപ്പിച്ച് 7,390 രൂപയിലെത്തിച്ചു.

-

കടുക് (Rapeseed / Mustard seed): 413 രൂപയുടെ വർധനവോടെ ക്വിന്റലിന് 6,613 രൂപയായി.

-

കുസുംഭപ്പൂവ് (Safflower): ക്വിന്റലിന് 675 രൂപ വർധിപ്പിച്ച് 7,215 രൂപയാക്കി.

കർഷകർക്ക് 90,962 കോടി രൂപയുടെ നേട്ടം

പുതുക്കിയ താങ്ങുവില പ്രകാരം വിപണന വർഷത്തിൽ കർഷകർക്ക് മൊത്തം 90,962 കോടി രൂപയോളം ലഭിക്കുമെന്നാണ് കണക്കാക്കുന്നത്. 324 ലക്ഷം ടൺ വിള സംഭരണമാണ് ഇതിലൂടെ സർക്കാർ പ്രതീക്ഷിക്കുന്നത്. കൂടാതെ, 2026-27 വിളവർഷത്തിൽ രാജ്യത്ത് 121 ദശലക്ഷം ടൺ ഗോതമ്പ് ഉത്പാദനമാണ് കൃഷി മന്ത്രാലയം ലക്ഷ്യമിടുന്നത്. വിത്ത് വിതയ്ക്കൽ ആരംഭിക്കുന്നതിന് മുൻപ് തന്നെ പ്രഖ്യാപിച്ച ഈ നിരക്ക് വർധനവ് രാജ്യത്തെ കർഷകർക്ക് വലിയ ആശ്വാസവും കൃഷിയിലേക്ക് കൂടുതൽ സജീവമായി ഇറങ്ങാൻ പ്രചോദനവുമാകും.

---------------

Hindusthan Samachar / Roshith K