Enter your Email Address to subscribe to our newsletters

Kochi, 19 നവംബര് (H.S.)
കൊച്ചി: രാഷ്ട്രീയ കേരളം ഏറെ ആകാംക്ഷയോടെ ഉറ്റുനോക്കിയിരുന്ന കണ്ണൂർ അരിയിൽ അബ്ദുൾ ഷുക്കൂർ വധക്കേസിൽ നീണ്ട 14 വർഷത്തിന് ശേഷം കൊച്ചിയിലെ പ്രത്യേക സി.ബി.ഐ. കോടതി സുപ്രധാന വിധി പ്രസ്താവിച്ചു. കേസിലെ 32-ാം പ്രതിയായ സി.പി.എം. നേതാവ് പി. ജയരാജനെയും 33-ാം പ്രതിയായ ടി.വി. രാജേഷിനെയും ഗൂഢാലോചന കുറ്റത്തിൽ നിന്നും കോടതി കുറ്റവിമുക്തരാക്കി. ഇരുവർക്കുമെതിരെ ചുമത്തപ്പെട്ട ക്രിമിനൽ ഗൂഢാലോചനാക്കുറ്റം സംശയാതീതമായി തെളിയിക്കാൻ പ്രോസിക്യൂഷന് സാധിച്ചില്ലെന്ന് വിലയിരുത്തിയാണ് കോടതി ഇവരെ വെറുതെ വിട്ടത്.
പി. ജയരാജനും ടി.വി. രാജേഷിനും പുറമെ, കേസിലെ 19-ാം പ്രതിയും സി.പി.എം. സംസ്ഥാന സെക്രട്ടറി എം.വി. ഗോവിന്ദന്റെ മകനുമായ ശ്യാംജിത്തിനെയും കോടതി വെറുതെ വിട്ടു. ഗൂഢാലോചന കുറ്റത്തിൽ പ്രതിചേർക്കപ്പെട്ടിരുന്ന സി.എൻ. മോഹനൻ, ഷാജി, നവീൻ, നിതിൻ, സുധാകരൻ, ഉമേഷൻ, ലതീഷ്, പ്രകാശൻ കെ., വിജേഷ്, ഗണേശൻ, അജയകുമാർ എന്നിവരെയും കോടതി കുറ്റവിമുക്തരാക്കിയിട്ടുണ്ട്. തളിപ്പറമ്പ് സഹകരണ ആശുപത്രിയിൽ വെച്ച് കൊലപാതകത്തിനുള്ള ഗൂഢാലോചന നടന്നുവെന്നായിരുന്നു സി.ബി.ഐയുടെ പ്രധാന കണ്ടെത്തൽ. എന്നാൽ, ഇത് തെളിയിക്കുന്നതിനുള്ള നിർണായക സാക്ഷികൾ കോടതിയിൽ ഹാജരായി മൊഴി നൽകാതിരുന്നത് പ്രോസിക്യൂഷന് വലിയ തിരിച്ചടിയായി.
അതേസമയം, കൊലപാതകത്തിൽ നേരിട്ട് പങ്കെടുത്ത ഒമ്പത് പ്രതികൾ കുറ്റക്കാരാണെന്ന് കോടതി കണ്ടെത്തി. കേസിലെ ഒന്നാം പ്രതി കെ.വി. സുമേഷ്, മൂന്നാം പ്രതി അനൂപ്, ഏഴാം പ്രതി പവിത്രൻ, ഒമ്പതാം പ്രതി മനോഹരൻ, പത്താം പ്രതി എൻ.പി. ദിനേശൻ, പന്ത്രണ്ടാം പ്രതി ബിജുമോൻ, പതിനാലാം പ്രതി ഇ.പി. രാധാകൃഷ്ണൻ, പതിനഞ്ചാം പ്രതി ഷിജിൻ മോഹൻ, ഇരുപത്തിയഞ്ചാം പ്രതി വി.വി. മോഹനൻ എന്നിവരാണ് കുറ്റക്കാരെന്ന് കോടതി വിധിച്ചത്. ഇവർക്കെതിരെ ഇന്ത്യൻ ശിക്ഷാ നിയമത്തിലെ 302 (കൊലപാതകം), 307 (കൊലപാതകശ്രമം), 341, 342, 120B, 143, 147, 148 എന്നീ വകുപ്പുകൾ പ്രകാരമുള്ള കുറ്റങ്ങൾ തെളിഞ്ഞതായി കോടതി വ്യക്തമാക്കി. കുറ്റക്കാരെന്ന് കണ്ടെത്തിയവരുടെ ശിക്ഷാവിധി സംബന്ധിച്ച വാദം പിന്നീട് നടക്കും.
2012 ഫെബ്രുവരി 20-നാണ് മുസ്ലിം ലീഗ് വിദ്യാർത്ഥി വിഭാഗമായ എം.എസ്.എഫിന്റെ പ്രാദേശിക പ്രവർത്തകനായിരുന്ന അരിയിൽ സ്വദേശി ഷുക്കൂർ കൊല്ലപ്പെട്ടത്. പി. ജയരാജനും ടി.വി. രാജേഷും സഞ്ചരിച്ച വാഹനവ്യൂഹത്തിന് നേരെ ആക്രമണമുണ്ടായതിനെ തുടർന്ന്, തളിപ്പറമ്പിലെ ചുള്ളിയോട് വയലിൽ വെച്ച് പരസ്യവിചാരണ നടത്തി ഷുക്കൂറിനെ കൊലപ്പെടുത്തിയെന്നാണ് കേസ്. ആകെ 33 പ്രതികളുണ്ടായിരുന്ന കേസിൽ വിചാരണയ്ക്കിടെ രണ്ടുപേർ മരണപ്പെട്ടതിനാൽ 31 പേരാണ് വിചാരണ നേരിട്ടത്. ഷുക്കൂറിന്റെ മാതാവ് ആത്തിക്ക നടത്തിയ നീണ്ട നിയമപോരാട്ടത്തിനൊടുവിലായിരുന്നു കേസ് സി.ബി.ഐ ഏറ്റെടുത്തത്. 17 മാസം നീണ്ട വിചാരണ നടപടികൾക്കൊടുവിലാണ് എറണാകുളം പ്രത്യേക സി.ബി.ഐ. കോടതി ഇപ്പോൾ ചരിത്രപ്രധാനമായ ഈ വിധി പുറപ്പെടുവിച്ചിരിക്കുന്നത്.
---------------
Hindusthan Samachar / Roshith K