ഗോത്ര വിഭാഗത്തെ ചൂഷണം ചെയ്യാത്ത രീതിയില് വനവിഭവങ്ങള് വിപണനം ചെയ്യും: മന്ത്രി ഷിബു ബേബി ജോണ്
Palakkad, 19 നവംബര്‍ (H.S.) ഗോത്ര വിഭാഗത്തെ ചൂഷണം ചെയ്യാത്ത രീതിയില്‍ തനത് വനവിഭവങ്ങള്‍ വിപണനം ചെയ്യാനുള്ള സൗകര്യമൊരുക്കുമെന്ന് വനം- വന്യജീവി, നൈപുണ്യ വികസന വകുപ്പ് മന്ത്രി ഷിബു ബേബി ജോണ്‍. മന്ത്രിയുടെ നേതൃത്വത്തില്‍ ഗോത്ര മേഖലകളില്‍ നടത്തുന്ന ഊരു
shibu


Palakkad, 19 നവംബര്‍ (H.S.)

ഗോത്ര വിഭാഗത്തെ ചൂഷണം ചെയ്യാത്ത രീതിയില്‍ തനത് വനവിഭവങ്ങള്‍ വിപണനം ചെയ്യാനുള്ള സൗകര്യമൊരുക്കുമെന്ന് വനം- വന്യജീവി, നൈപുണ്യ വികസന വകുപ്പ് മന്ത്രി ഷിബു ബേബി ജോണ്‍. മന്ത്രിയുടെ നേതൃത്വത്തില്‍ ഗോത്ര മേഖലകളില്‍ നടത്തുന്ന ഊരുണര്‍വ് സന്ദര്‍ശനത്തിന്റെ ഭാഗമായി അട്ടപ്പാടി ഷോളയൂരിലെ സിങ്കപ്പാറ, മുക്കാലിയിലെ ചിണ്ടക്കി, തടിക്കുണ്ട് എന്നീ ഉന്നതികളിലെ ഇരുളര്‍, മുഡുഗര്‍, കുറുമ്പര്‍ എന്നീ ഗോത്രവര്‍ഗ്ഗ വിഭാഗക്കാരെ നേരില്‍ കണ്ട് സംസാരിക്കുകയായിരുന്നു മന്ത്രി.

ഗോത്ര വിഭാഗക്കാരില്‍ നിന്ന് വനവിഭവങ്ങള്‍ വനം വകുപ്പ് നേരിട്ട് ശേഖരിക്കുകയും ഉയര്‍ന്ന വില ഉറപ്പാക്കുകയും ചെയ്യും. വനവിഭവങ്ങള്‍ സ്വീകരിക്കുന്നതിന് നോ ഒബ്ജക്ഷന്‍ സര്‍ട്ടിഫിക്കറ്റ് അടിയന്തിരമായി നല്‍കണമെന്ന് മന്ത്രി ഉദ്യോഗസ്ഥര്‍ക്ക് നിര്‍ദേശം നല്‍കി. ഉത്തരവാദിത്വ ടൂറിസം മുഖേന ടൂറിസത്തിന്റെ സാധ്യത പ്രയോജനപ്പെടുത്തിയ ഊര് നിവാസികള്‍ക്ക് അതിലൂടെ കിട്ടുന്ന വരുമാനം വീതിച്ച് നല്‍കുമെന്നും മന്ത്രി പറഞ്ഞു.

മൂന്ന് ഗോത്ര വിഭാഗങ്ങളും ഉന്നയിച്ച കുടിവെള്ള പ്രശ്‌നത്തിന് ശാശ്വത പരിഹാരം കണ്ടെത്തും. വന്യജീവികളെ തടയുന്നതിന് 28 കിലോമീറ്റര്‍ ചുറ്റളവില്‍ ഫെന്‍സിംഗ് നടപ്പാക്കും. വന്യജീവികളെ ആകർഷിക്കാത്ത രീതിയിലുള്ള കൃഷികൾ പ്രോത്സാഹിപ്പിക്കും. ചിണ്ടക്കിയിലെ ഇരുളര്‍ വിഭാഗക്കാരുടെ കുട്ടികള്‍ക്ക് അങ്കണവാടിയിലേക്ക് എത്തുന്നതിന് ആവശ്യമായ വാഹന സൗകര്യം ഒരുക്കും. ഉന്നതികളില്‍ തന്നെ അങ്കണവാടി സ്ഥാപിക്കുന്ന കാര്യം ബന്ധപ്പെട്ട വകുപ്പുമായി ചര്‍ച്ച ചെയ്യുമെന്നും മന്ത്രി പറഞ്ഞു.

ഉന്നതിയിലെ യുവാക്കള്‍ക്കായി ഫുട്‌ബോള്‍ ഉള്‍പ്പെടെയുള്ള കായിക വിനോദങ്ങള്‍ക്ക് ആവശ്യമായ ഗ്രൗണ്ടും അനുബന്ധ സൗകര്യങ്ങളും ഉറപ്പാക്കും. അനധികൃത വാറ്റിനെതിരെ വനം വകുപ്പിന്റെ ശക്തമായ ഇടപെടല്‍ ഉണ്ടാകും. കൂടാതെ വകുപ്പിന്റെ നേതൃത്വത്തില്‍ ശനി, ഞായര്‍ ദിവസങ്ങളില്‍ ഊരിലെ കുട്ടികള്‍ക്ക് പി.എസ്.സി പരിശീലനം നല്‍കും.

തൊഴിലുറപ്പ്, ഇ-ഗ്രാന്റ്‌സ്, കൈവശരേഖ തുടങ്ങിയ വിഷയങ്ങളിലും വിവിധ വകുപ്പുമായി ബന്ധപ്പെട്ട വിഷയങ്ങളിലും അതത് വകുപ്പുകളെ ഉള്‍പ്പെടുത്തി മുഖ്യമന്ത്രിയുടെ നേതൃത്വത്തില്‍ യോഗം ചേരും. ആറുമാസത്തിന് ശേഷം ഊരുകള്‍ സന്ദര്‍ശിച്ച് നിലവില്‍ എടുത്ത തീരുമാനങ്ങള്‍ നടപ്പിലാക്കുന്നുണ്ടോ എന്ന് പരിശോധിച്ച് ഉറപ്പുവരുത്തുമെന്ന് മന്ത്രി പറഞ്ഞു. ആദിവാസി വിഭാഗങ്ങളുടെ തനത് പാരമ്പര്യ ശീലങ്ങള്‍ കൈമോശം വരുന്നത് പഠിക്കുകയും അവയെ നഷ്ടപ്പെടാതെ പരിരക്ഷിക്കുകയും ചെയ്യുക എന്നതാണ് ലക്ഷ്യമെന്നും അദ്ദേഹം കൂട്ടിച്ചേർത്തു.

പരിപാടിയില്‍ അഡീഷണല്‍ പ്രിന്‍സിപ്പല്‍ ചീഫ് ഫോറസ്റ്റ് കണ്‍സര്‍വേറ്റര്‍ ( സോഷ്യല്‍ ഫോറസ്ട്രി) ഡോ. പ്രമോദ്. ജി. കൃഷ്ണന്‍ ഐ.എഫ്.എസ്, ചീഫ് ഫോറസ്റ്റ് കണ്‍സര്‍വേറ്റര്‍ (വൈല്‍ഡ്‌ലൈഫ്) നോര്‍ത്തേണ്‍ റീജിയണ്‍ ടി. ഉമ ഐ.എഫ്.എസ്, ചീഫ് ഫോറസ്റ്റ് കണ്‍സര്‍വേറ്റര്‍ ഇസ്റ്റേണ്‍ സര്‍ക്കിള്‍ ആര്‍. കമലാഹര്‍ ഐ.എഫ്.എസ്, സൈലന്റ് വാലി ഡിവിഷന്‍ വൈല്‍ഡ് ലൈഫ് വാര്‍ഡന്‍ ജി.ഹരികൃഷ്ണന്‍ നായര്‍ ഐ.എഫ്.എസ്, മണ്ണാര്‍ക്കാട് ഡി.എഫ്.ഒ. പ്രവീണ്‍, പലക്കാട് വിജിലന്‍സ് ഡി.എഫ്.ഒ. എം.കെ സമീര്‍, ഭവാനി റെയിഞ്ച് അസിസ്റ്റന്റ് വൈല്‍ഡ് ലൈഫ് വാര്‍ഡന്‍ എ.പി. ശ്രീജിത്ത്, സൈലന്റ് വാലി നാഷണല്‍ പാര്‍ക്ക് അസിസ്റ്റന്റ് വൈല്‍ഡ് ലൈഫ് വാര്‍ഡന്‍ വി.എസ് വിഷ്ണു, മറ്റ് വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

അട്ടപ്പാടി മുക്കാലിയില്‍ മരണപ്പെട്ട കുഞ്ഞിന്റെ വീട് മന്ത്രി സന്ദര്‍ശിച്ചു

അട്ടപ്പാടി മുക്കാലിയില്‍ മരണപ്പെട്ട കുഞ്ഞിന്റെ വീട് സന്ദര്‍ശിച്ച് ഊരുകളിലെ ആരോഗ്യ സംബന്ധമായ കാര്യങ്ങളിൽ വേണ്ട ഇടപെടലുകൾ നടത്തുമെന്ന് മന്ത്രി ഷിബു ബേബി ജോണ്‍ പറഞ്ഞു. ഇതിന്റെ ഭാഗമായി വനം വകുപ്പ് ആംബുലന്‍സ് സൗകര്യം ഏര്‍പ്പെടുത്തും. കൂടാതെ വനം വകുപ്പിന്റെ നേതൃത്വത്തില്‍ ഊരുകളിൽ പി.എസ്.സി കോച്ചിംഗും നല്‍കും.

---------------

Hindusthan Samachar / Sreejith S


Latest News